ప్రకాశం జిల్లా చీరాలలో మాస్క్ పెట్టుకోలేదని దళిత యువ‌కుడు కిర‌ణ్‌కుమార్ను.. పోలీసులు కొట్టి చంపి ఏడాదయినా నిందితులపై ఇంతవరకు చర్యలు తీసుకోలేదని తెదేపా జాతీయ ప్రధాన కార్యదర్శి నారా లోకేశ్ మండిపడ్డారు. బాధిత కుటుంబానికి రూ. 50లక్షలు పరిహారం ఇవ్వాలని లోకేశ్ డిమాండ్ చేశారు.
"ఎస్సీలంటే జగన్ రెడ్డికి ఎందుకింత క‌క్ష. త‌ల్లి ,తండ్రి, చెల్లెళ్లల్ని కంటికి రెప్ప‌లా కాపాడే కిర‌ణ్‌ని వైకాపా సెక్ష‌న్ కింద కిరాత‌కంగా చంపడానికి బులుగు ఖాకీలకు మ‌న‌సెలా ఒప్పింది. జ‌గ‌న్‌రెడ్డి ఫ్యాక్ష‌న్ పాల‌న‌లో ఎస్సీలకు బ‌తికే హ‌క్కులేదా. మాస్క్ పెట్టుకోక‌పోవ‌డం నేర‌మైతే, రోజూ మాస్క్ పెట్టుకోని జ‌గ‌న్‌రెడ్డికి ఏ శిక్ష విధిస్తారు. కిరణ్ హ‌త్య వెనుకున్న కార‌ణాల‌పై ద‌ర్యాప్తు జరిపి హంత‌కులైన ఎస్ఐ, కానిస్టేబుళ్ల‌ను శిక్షించాలి."-నారా లోకేశ్.