కొవిడ్ నియంత్రణ‌కు కేంద్రం ఇచ్చిన నిధులు మింగేస్తున్నారని తెదేపా జాతీయ ప్రధాన కార్యదర్శి నారా లోకేశ్ ఆరోపించారు. సీఎం జగన్ తనకు ప్రాణాలు విలువ బాగా తెలుసని అసెంబ్లీలో చెప్పటం అతి పెద్ద జోక్ అని ఎద్దేవా చేశారు. సొంత బాబాయికే పాపం ఆ విషయం తెలియదని వ్యంగ్యాస్త్రాలు సంధించారు. ప్రాణాలు విలువ అంతగా తెలిసిన వారైతే మాస్క్ పెట్టుకుని ప్రజ‌ల‌కు ఆద‌ర్శంగా నిలిచేవారన్నారు. ఆరు నెల‌ల్లో ఒక్కసారైనా అసెంబ్లీ నిర్వహించ‌క‌పోతే ప్రభుత్వ మ‌నుగ‌డ‌కి ప్రమాదం కాబట్టే ఒక్కరోజు నామ‌మాత్రపు అసెంబ్లీ నిర్వహించారని మండిపడ్డారు.
జగన్మోహన్ రెడ్డి చెప్పినట్లు కొవిడ్ రోగుల కోసం 150కి పైగా ల్యాబ్లు ఉంటే ఫలితం వారం రోజులు ఎందుకు ప‌డుతుందో స‌మాధానం చెప్పాలని నారా లోకేశ్ డిమాండ్‌ చేశారు. కొవిడ్ రోగుల కోసం 47 వేల పడకలు అందుబాటులో ఉంటే ఆస్పత్రి ఆవ‌ర‌ణ‌లోనే రోజూ ప‌దుల సంఖ్యలో ఎందుకు చ‌నిపోతున్నారన్నారు. ఆక్సిజ‌న్ కొర‌త లేకుంటే విజ‌య‌న‌గ‌రం, రుయా, అనంత‌పురం ఆస్పత్రుల‌లో క‌రోనా రోగులు ఎలా చ‌నిపోయారో చెప్పాలన్నారు. సకాలంలో వ్యాక్సిన్‌కి ఆర్డర్లు పెట్టకుండా చంద్రబాబు పైన ఏడిస్తే ఏం ప్రయోజ‌నమని లోకేశ్ ఆగ్రహం వ్యక్తం చేశారు. సీబీఐ కేసులకు భయపడి రాష్ట్రానికి రావాల్సిన వ్యాక్సిన్ కోటాని అడ‌గ‌లేక చంద్రబాబుపై విమర్శలు గుప్పిస్తున్నారన్నారు.