వైఎస్సార్ చేయూత పథకాల ద్వారా మహిళలకు ఆర్థిక స్వావలంబన కల్పించేందుకు వివిధ ప్రైవేటు సంస్థలతో రాష్ట్ర ప్రభుత్వం ఒప్పందాలు కుదుర్చుకుంది. గ్రామీణ పేదరిక నిర్మూలనా సంస్థ సెర్ప్ -ప్రైవేటు సంస్థల మధ్య మొత్తం 14 సంస్థలతో వ్యాపార ఒప్పందాలు కుదిరాయి. మంత్రులు పెద్దిరెడ్డి, బొత్స, కన్నబాబు, అప్పలరాజులతో కూడిన కమిటీ సమక్షంలో ఈ ఒప్పందాలు జరిగాయి. చేయూత పథకం ద్వారా మహిళలకు ఉపాధి కల్పించేందుకు ప్రభుత్వం కృషి చేస్తోందని.. మరో 6 లక్షల మందికి ఉపాధి కల్పిస్తామని మంత్రులు వెల్లడించారు.
గతేడాది 3 లక్షల కుటుంబాలకు చేయూత ద్వారా ఉపాధి కల్పించామన్నారు. ఈ ఏడాది చేయూత, ఆసరా పథకాల ద్వారా 11 వేల కోట్లను ఖర్చు చేయనున్నట్లు వెల్లడించారు. వైఎస్సార్ చేయూత ద్వారా గతేడాది అమూల్తో ఒప్పందం చేసుకుని మహిళల ఆర్థిక స్వావలంబనకు కృషి చేసినట్లు మత్స్య, పశుగణాభివృద్ధి శాఖ మంత్రి సీదిరి అప్పలరాజు అన్నారు. ఈ ఏడాదిలో పౌల్ట్రీ, బ్యాక్ యార్డ్ పౌల్ట్రీ, మినీ పౌల్ట్రీలపై దృష్టి పెట్టనున్నట్లు తెలిపారు. చేయూత ద్వారా ఐదేళ్లలో అందించే 75 వేల కంటే అదనపు ఆర్థిక సాయం కావాలంటే బ్యాంకుల ద్వారా రుణం అందిస్తామని మంత్రి బొత్స స్పష్టం చేశారు.