'వర్గమేదో తెలియకుండా ఎస్సీ ఎస్టీ కేసు ఎలా పెడతారు?'

జర్నలిస్టులపై తుళ్లూరు పోలీసులు పెట్టిన ఎస్సీ, ఎస్టీ అట్రాసిటీ కేసును హైకోర్టు కొట్టేసింది. ఫిర్యాదుదారు ఏ సామాజికవర్గానికి చెందినవారో తెలియకుండా కేసులు పెట్టడం సమంజసం కాదని తెలిపింది. మీడియా ప్రతినిధులపై ఇలా వ్యవహరించడం మంచిది కాదని అభిప్రాయపడింది.

రాజధాని పరిధిలో జర్నలిస్టులపై నమోదైన ఎస్సీ, ఎస్టీ అట్రాసిటీ కేసులపై హైకోర్టు స్పందించింది. ఫిర్యాదు చేసిన మహిళా కానిస్టేబుల్ ఏ సామాజికవర్గానికి చెందినవారో తెలియనప్పుడు... వారిపై ఎస్సీ, ఎస్టీ కేసులు ఎలా నమోదు చేస్తారని పోలీసులను ప్రశ్నించింది. ఏ సామాజికవర్గానికి చెందినవారనే విషయంపై ఎలాంటి ఆధారమూ లేదని పేర్కొంది. అందువల్ల జర్నలిస్టులపై ఎస్సీ, ఎస్టీ కేసు చెల్లదని తేల్చిచెప్పింది. ఎఫ్​ఐఆర్ నమోదైన ఇతర సెక్షన్లు బెయిలబుల్ స్వభావం ఉన్నందున... తగిన ఫోరాన్ని ఆశ్రయించి ఉపశమనం పొందవచ్చని సూచించింది. హైకోర్టు న్యాయమూర్తి జస్టిస్ మానవేంద్రనాథ్ రాయ్ ఈ మేరకు ఉత్తర్వులు ఇచ్చారు. రాజధాని పరిధిలోని మందడం ప్రభుత్వ పాఠశాలలో తరగతి గదుల్ని పోలీసులకు కేటాయించి, పిల్లలకు ఆరుబయట పాఠాలు చెబుతున్నారు. ఈ విషయం తెలుసుకున్న మీడియా ప్రతినిధులు... విధి నిర్వహణలో భాగంగా అక్కడికి వెళ్లిన సమయంలో కొంత గందరగోళం నెలకొంది. ఒంగోలు పోలీసు శిక్షణ కేంద్రం నుంచి బందోబస్తు కోసం వచ్చిన ఓ మహిళా కానిస్టేబుల్ ఫిర్యాదుతో... జర్నలిస్టులపై కేసు నమోదు చేశారు. ఆ కేసులో ముందస్తు బెయిలు కోరుతూ ఇద్దరు జర్నలిస్టులు హైకోర్టును ఆశ్రయించారు. వారి తరఫున వాదనలు వినిపించిన రాజేంద్రప్రసాద్... జర్నలిస్టులను భయాందోళనకు గురిచేసేందుకే తుళ్లూరు పోలీసులు కేసు నమోదు చేశారని కోర్టుకు నివేదించారు. ఫిర్యాదుదారు ఏ సామాజికవర్గానికి చెందినవారో తెలియనప్పుడు.. ఎస్సీ, ఎస్టీ కేసు నమోదు సరికాదన్నారు. అలాగే ఫిర్యాదు చేయడంలోనూ జాప్యం జరిగినట్లు కోర్టుకు వివరించారు. ఆ వాదనలను పరిగణనలోకి తీసుకున్న న్యాయమూర్తి... ఎస్సీ, ఎస్టీ కేసు వర్తించదని తేల్చిచెప్పారు.

ఇదీ చూడండి :