ఉత్తర్వు సరి చేయాలని కోరేందుకే సీఎస్‌ను కలవాలని అనుకున్నానని.., తనను కలిసేందుకు సీఎస్ ఇష్టపడడం లేదని సీనియర్ ఐపీఎస్ అధికారి ఏబీ వెంకటేశ్వరరావు వెల్లడించారు. తన వినతిపత్రం చదివితే దానిలో ఏముందో తెలిసేదన్నారు. జీఏడీలో రిపోర్ట్ చేయడం వరకే తన పని అని స్పష్టం చేశారు. సస్పెన్షన్ ఎత్తివేత అనంతరం జీఏడీలో రిపోర్ట్ చేసిన ఆయన.. విజయవాడలోని తన నివాసంలో మీడియా సమావేశం నిర్వహించారు.
"జీఏడీలో రిపోర్ట్ చేయడం వరకే నా పని. రెండేళ్ల సస్పెన్షన్ గురించి మాట్లాడటం లేదు. ఉత్తర్వు సరిచేయాలని కోరేందుకే సీఎస్‌ను కలవాలని అనుకున్నా. పోస్టింగ్ ఇవ్వలేదు.. జీతం ఇచ్చేందుకు ఇబ్బంది ఏమిటి ?. తప్పు చేస్తే శిక్షించాలి లేదా సమయానికి జీతం ఇవ్వాలి. చట్టప్రకారం మాత్రమే ముందుకెళ్లా. నాకు అనుకూలంగా కోర్టు తీర్పు వచ్చింది. నా సస్పెన్షన్ చట్టవిరుద్ధమని హైకోర్టు చెప్పింది. నేనేం తప్పు చేశానో అధికారులు తేల్చాలి. నేను ఏమైనా తప్పులు చేస్తే బయటకు చెప్పాలి కదా." -ఏబీ వెంకటేశ్వరరావు, సీనియర్ ఐపీఎస్ అధికారి
తన సస్పెన్షన్ ఎత్తేస్తూ ప్రభుత్వం తాజాగా విడుదల చేసిన జీవో అసంపూర్ణంగా ఉందని సీనియర్ ఐపీఎస్ అధికారి ఏబీ వెంకటేశ్వరరావు తెలిపారు. హైకోర్టు ఆదేశాల మేరకు.. 2020 ఫిబ్రవరి 8వ తేదీ నుంచే సస్పెన్షన్ ఎత్తివేత వర్తింపజేయాల్సి ఉన్నప్పటికీ ఈ ఏడాది ఫిబ్రవరి 8 నుంచి తొలగిస్తున్నట్లు ఉత్తర్వుల్లో పేర్కొన్నారని, ఇది సరికాదని చెప్పారు. అధికారులు న్యాయస్థానాల ఆదేశాల్ని సరిగ్గా చదవలేదా? లేకుంటే న్యాయాభిప్రాయమే అలా వచ్చిందా? అనేది తనకు తెలియదని వివరించారు. ‘మీరిచ్చిన ఆదేశాలు అసంపూర్ణంగా ఉన్నాయి. వాటిని సరిచేయండి. లేకుంటే మళ్లీ న్యాయస్థానాన్ని ఆశ్రయించక తప్పదు’ అనే విషయాన్ని సీఎస్ దృష్టికి తీసుకెళ్లేందుకు ఆయనను కలవాలనుకున్నానని, సీఎస్ కార్యాలయంలో అందుబాటులో ఉన్నప్పటికీ తనను కలవటానికి ఇష్టపడలేదని వివరించారు. ప్రతి అంశం అమలు కోసం కోర్టును ఆశ్రయించాలంటే ఎన్నో వ్యయప్రయాసలుంటాయని తెలిపారు. విజయవాడలోని తన నివాసంలో ఆయన గురువారం విలేకరులతో మాట్లాడారు. ‘సీఎస్ సమీర్‌ శర్మను కలిసి జాయినింగ్‌ రిపోర్టు ఇవ్వటానికి వెళ్లాను. ఆ రిపోర్టు తీసుకుని పంపించేయాలంటూ సీఎస్ చెప్పారని ఆయన పీఏ తెలిపారు. సివిల్‌ సర్వీసెస్‌ సంప్రదాయం ప్రకారం జూనియర్‌ అధికారులకు సీనియర్లు రిపోర్టు చేయరు. అందుకే సీఎస్‌ను కలవాలనుకున్నా. సీఎస్ పదవీ విరమణ వయసు అయిపోయి పొడిగింపుపై కొనసాగుతున్నారు. నాకు ఇంకా రెండేళ్లు సర్వీసు ఉంది. నేనూ ఆయనలాగే అదే యూపీఎస్సీ పరీక్ష రాసే వచ్చాను కదా! నాలాగే పోస్టింగు ఇవ్వకుండా వీఆర్‌లో ఉంచిన కొందరు ఐఏఎస్‌ అధికారులకు మాత్రం జీతాలు ఇచ్చారు. నాకు మాత్రం ఏడు నెలల పాటు ఇవ్వలేదు. చివరికి కోర్టును ఆశ్రయిస్తే తప్ప నాకు జీతం ఇవ్వలేదు. ఐఏఎస్‌లకు ఓ న్యాయం, మాకో న్యాయమా?
సంవత్సరాల తరబడి వీఆర్‌లో పెట్టారు..కానిస్టేబుల్‌ నుంచి ఎస్పీ ర్యాంకు అధికారుల వరకూ చాలామందిని సంవత్సరాల తరబడి వీఆర్‌లో పెట్టారు. తర్వాత పోస్టింగు ఇచ్చినా వీఆర్‌లో ఉన్న కాలానికి జీతాలు ఇవ్వలేదు. తాము ఫలానా కులానికి చెందిన వాళ్లం కాబట్టి వీఆర్‌లో పెట్టారని కొందరు, అప్పట్లో నిఘా విభాగంలో పని చేసినందున పక్కన పెట్టారని మరికొందరు.. మీ దగ్గర పని చేశామని మీకు బాగా దగ్గరగా ఉన్నామనే కారణంతో తమకు పోస్టింగులు ఇవ్వలేదంటూ మరికొందరు నాతో చెప్పి వాపోయారు. నిజంగా వారు తప్పు చేస్తే శిక్షించండి. అంతే తప్ప వేతనంపైనే బతికే ఉద్యోగులకు రెండేళ్లపాటు జీతం ఇవ్వకపోతే వారు ఎలా బతుకుతారు? ఇవన్నీ సీఎస్ దృష్టికి తీసుకెళ్లాలనుకున్నా.