కలిసి పోటీ చేసిన వారికే ఆ కార్పొరేషన్ సొంతం..!

కలిసి పోటీ చేసిన వారికే అక్కడి కార్పొరేషన్ సొంతం. పొత్తుపెట్టుకున్న పార్టీలే అధికసార్లు కైవసం చేసుకోగా... ఈసారి ఆ సెంటిమెంట్ పై రాజకీయ పార్టీలు నమ్మకం పెట్టుకున్నాయి. ఇప్పటి వరకు 6 సార్లు విజయవాడ నగరపాలక సంస్థకు ఎన్నికలు జరిగితే అత్యధికసార్లు ప్రధాన రాజకీయ పార్టీలు పోత్తులతోనే ఎన్నికల్లో పోటీచేయటం విశేషం. ఈసారీ ప్రధానపక్షాలు పొత్తులతోనే ముందుకు సాగుతున్న వేళ సెంటిమెంట్ ఎవరివైపు పనిచేస్తుందో వేచి చూడాలి.

విజయవాడలో నగరపాలక సంస్థ ఎన్నికల్లో వివిధ రాజకీయ పార్టీలు పొత్తులతో తలపడుతుండగా....వైకాపాతోపాటు, సీపీఎం, కాంగ్రెస్‌ ఒంటరిగానే తలపడుతున్నాయి. తెలుగుదేశం, సీపీఐ పక్షాలు అనూహ్యంగా పొత్తు కుదుర్చుకున్నాయి. భారతీయ జనతా పార్టీ, జనసేన పొత్తుకుదుర్చుకుని బరిలో దిగాయి. తెలుగుదేశం పార్టీ 57 డివిజన్లలో పోటీకి దిగుతుండగా, సీపీఐ 6 డివిజన్లలో పోటీ చేస్తోంది. 15వ డివిజన్‌లో స్థానిక పరిస్థితుల దృష్ట్యా జనసేనకి తెదేపా మద్దతు తెలిపి పోటీలో నిలబడలేదు. ఇలా 3 పార్టీలు ప్రత్యక్షంగాను, పరోక్షంగాను కలిసి పోటీ చేస్తున్నాయి.

ఇక భాజపా 22 డివిజన్లలో పోటీ చేస్తుండగా... జనసేన 40స్థానాల్లో పోటీకి దిగింది. సీపీఎం పక్షం అయితే ఈసారి తనకు బలం ఉన్న డివిజన్లకు ఎంచుకుని 22 డివిజన్లలో ఒంటరిగా పోటీకి దిగుతోంది. కాంగ్రెస్‌ 40 డివిజన్లలో పోటీకి దిగింది.

నగరపాలక సంస్థ 1981లో ఏర్పడగా, మొదటిసారి కార్పొరేషన్‌కు జరిగిన ఎన్నికల్లో పలు రాజకీయ పక్షాలు పొత్తులతోనే ఎన్నికల బరిలో నిలిచి గెలిచాయి. 1987లో మాత్రం ఒంటిరిగా బరిలో దిగిన కాంగ్రెస్‌ పీఠం దక్కించుకుంది. 1995లో వామపక్షాలు కలిసి పాలకపగ్గాలు చేపట్టాయి. 1999లో తెలుగుదేశం, భాజపా కలిసి ఎన్నికల బరిలో నిలవగా... తెలుగుదేశం అతిపెద్దపార్టీగా అవతరించి పీఠం దక్కించుకుంది. 2005లో కాంగ్రెస్, వామపక్షాలు కలిసి పోటీచేసి అధికార పీఠాన్ని కైవసం చేసుకున్నాయి. 2014లో జరిగిన ఎన్నికల్లో తెలుగుదేశం పార్టీ భాజపా మద్దతుతో పోటీకిదిగి అత్యధిక డివిజన్లను దక్కించుకుంది. ఈసారి మాత్రం అదృష్టం ఎవరిని వరిస్తుందో అనే విషయంపై సర్వత్రా ఆసక్తి నెలకొంది.

ఇదీచూడండి:రాష్ట్రంలో ముమ్మరంగా మున్సిపల్ ఎన్నికల ప్రచారం