కరోనా లాక్‌డౌన్‌తో ఒక్కసారిగా జనజీవనం స్తంభించింది. ఎక్కడివారు అక్కడే చిక్కుకుపోయారు. అలాగే నిత్యం రద్దీగా ఉండే కాశీలో వేలాదిమంది భక్తులు ఉండిపోయారు. వారందరికి లాక్‌డౌన్‌ సమయంలో శ్రీరామ తారక ఆంధ్ర ఆశ్రమం వారు ఉచిత వసతి, భోజనం ఏర్పాటు చేసింది. తన సొంత ఖర్చులతో బస్సులను ఏర్పాటు చేసి వారిని స్వస్థలాలకు పంపించింది.
లాక్‌డౌన్‌ సడలింపుల్లో భాగంగా దేవాలయాలన్నీ తెరుచుకున్నాయి. మళ్లీ కాశీ విశ్వేశ్వరుణ్ని దర్శించుకునేందుకు తెలుగు రాష్ట్రాల నుంచి భక్తులు తరలివెళ్తున్నారు. వారందరికి శ్రీరామ తారక ఆంధ్ర ఆశ్రమం వారు కరోనా నిబంధనలతో సేవలందిస్తున్నారు. అందులో భాగంగా ఆశ్రమానికి ప్రధాన ద్వారం దగ్గర శానిటైజేషన్‌ టన్నెల్‌ను ఏర్పాటు చేసింది. ఆశ్రమం మొత్తం రోజుకి రెండుసార్లు రసాయనాలతో శుభ్రం చేస్తున్నారు. భోజనాలు ఏర్పాటు చేసే దగ్గర రెండు గజాల దూరం పాటించేలా పకడ్భందీగా చర్యలు తీసుకుంటున్నారు. రూమ్‌లు ఖాళీ అయిన తర్వాత క్రమం తప్పకుండా శానిటైజేషన్‌ చేస్తున్నారు.