పంచాయతీ ఎన్నికల్లో ప్రజాస్వామ్యాన్ని ఖూనీ చేశారు: అయ్యన్న

ప్రభుత్వం ఎన్ని దారుణాలు చేసినా.. పోలీసులు ఎంత ఇబ్బంది పెట్టినా.. పంచాయతీ ఎన్నికల్లో తెదేపా శ్రేణులు పోరాటపటిమను కనబరిచాయని ఆ పార్టీ సీనియర్ నేత అయ్యన్నపాత్రుడు కొనియాడారు. తెదేపా కార్యకర్తలు పంచాయతీ ఎన్నికలు ఎదుర్కొన్న తీరు హర్షణీయమన్నారు.

తెదేపా కార్యకర్తలు పంచాయతీ ఎన్నికలు ఎదుర్కొన్న తీరు హర్షణీయమని ఆ పార్టీ పొలిట్​బ్యూరో సభ్యులు అయ్యన్నపాత్రుడు అన్నారు. ఎన్ని దారుణాలు చేసినా.. పోలీసులు ఎంత ఇబ్బంది పెట్టినా..శ్రేణులు పోరాట పటిమ కనబరిచాయని అభినందించారు.

"పంచాయతీ ఎన్నికల్లో వైకాపా నేతలు ప్రజాస్వామ్యాన్ని ఖూనీ చేశారు. ఎన్నికలు ప్రజాస్వామ్యబద్ధంగా జరగనివ్వకుండా దారుణంగా, కిరాతకంగా నిర్వహించిన తీరు అంతా చూశారు. ఓటేసే స్వేచ్ఛ కూడా ప్రజలకు లేకుండా చేశారు. అభ్యర్థులు పోటీ చేయకుండా దౌర్జన్యాలు చేశారు. ఎక్కడ చూసినా కుట్రలు, దౌర్జన్యాలు, ఇంటికెళ్లి కొట్టడం, చంపడం వంటి ఘటనలే చోటు చేసుకున్నాయి. నా రాజకీయ జీవితంలో ఇంత దారుణమైన ఎన్నికలు ఎప్పుడూ చూడలేదు" -అయ్యన్నపాత్రుడు, తెదేపా పొలిట్​బ్యూరో సభ్యులు

పోలవరం నీటిని సన్న బియ్యం వాహనాల్లో తరలిస్తారా ?

దొంగ లెక్కలు చెప్పటానికి తెదేపా..విజయసాయి రెడ్డి పెట్టిన సూట్​కేసు కంపెనీ కాదని ఎమ్మెల్సీ బుద్దా వెంకన్న ధ్వజమెత్తారు. "కేంద్రం మెడలు వంచేసి, నీటి నిల్వ సామర్ధ్యాన్ని 41.15 మీటర్లకు తగ్గించి, మీ దొంగల బ్యాచ్ చేస్తున్న పనులు అందరికీ తెలుసు. అదే జరిగితే ఉత్తరాంధ్ర సుజల స్రవంతికి నీళ్లు ఎలా వస్తాయి. విశాఖ జిల్లా ప్రజల అవసరాలు ఎలా తీరుతాయి. పోలవరం నుంచి సన్నబియ్యం వాహనాల్లో నీరు తరలిస్తారా. దొంగ లెక్కల రెడ్డి దొంగ లెక్కలు చెప్తే, ప్రజలు మరోసారి పాదరక్షల సన్మానం చేస్తారు" అని ట్విటర్ వేదికగా దుయ్యబట్టారు.

వార్ సీబీఎన్ సైడ్ అని తేలిపోయింది

"వైకాపా నాయకుల పూర్వీకుల ఊర్లని లెక్కేసుకుంటే తెదేపా గెలిచిన స్థానాల వివరం తెలుస్తుంది. ఆ ఊర్లో మేము పుట్టలేదు అని ఒకరు, అది మా పూర్వీకుల ఊరు అని ఒకరు, అసలు మా ఊరు ఏపీలోనే లేదని మరో వైకాపా నేత భుజాలు తడుముకున్నారు. సరిపోదా..అంతమంది మంత్రులు, సలహాదారులు ప్రెస్ మీట్లు పెట్టినప్పుడే వార్ వన్ సైడ్ కాదు, సీబీఎన్ సైడ్ అని తేలిపోయింది" -మాజీమంత్రి జవహర్

ఇదీచదవండి