CPS Employees On Old Pension Scheme: సీపీఎస్ రద్దు చేయటం మినహా మరో మార్గమేదీ లేదని ప్రభుత్వానికి తెలిపామని సీపీఎస్ ఉద్యోగుల సంఘం స్పష్టం చేసింది. మంత్రి బొత్స సత్యనారాయణ నివాసంలో జరిగిన సమావేశానికి సీపీఎస్ ఉద్యోగుల సంఘం నేతలతో పాటు.. ఏపీ సచివాలయంలోని సీపీఎస్ ఉద్యోగులు హాజరయ్యారు. సెప్టెంబరు 1వ తేదీన నిర్వహించే సీఎం నివాసం ముట్టడి, విజయవాడ మిలియన్ మార్చ్ కార్యక్రమాలను విరమించుకోవాల్సిందిగా మంత్రి బొత్స కోరినట్టుగా ఉద్యోగ సంఘాల నేతలు స్పష్టం చేశారు. పాత పెన్షన్పై చర్చిస్తామంటేనే మంత్రి బొత్స వద్ద చర్చలకు హాజరయ్యామని సీపీఎస్ ఉద్యోగులు వెల్లడించారు. ఎన్నికల్లో హామీ ఇవ్వకపోయినా రాజస్థాన్, ఛత్తీస్ఘడ్ రాష్ట్రాల్లో సీపీఎస్ను రద్దు చేశారని గుర్తు చేశారు. పథకం పేరు మార్చినా పాత పెన్షన్ స్కీం ప్రయోజనాలు దక్కాలన్నదే ఉద్యోగులుగా తమ డిమాండ్ అని స్పష్టం చేశారు.
ప్రభుత్వం సీపీఎస్ను రద్దు చేసేంత వరకూ తమ ఆందోళనలు ఆపేది లేదని ఉద్యోగ సంఘ నేతలు స్పష్టం చేశారు. గతంలో ప్రకటించిన కార్యాచరణ కొనసాగుతుందని ఉద్యోగ సంఘాల నేతలు తేల్చి చెప్పారు. సెప్టెంబరు 1న నిర్వహించనున్న సీఎం నివాసం ముట్టడి కార్యక్రమానికి సంబంధించిన పోస్టర్ను ఉద్యోగ సంఘాల నేతలు ఆవిష్కరించారు. సీపీఎఎస్ ఉద్యోగుల ఆందోళన కార్యక్రమాలకు సంబంధించిన అంశాలపై ఇంటెలిజెన్స్ వర్గాలు ఇప్పటికే తమ నివాసాల్లో కుటుంబ సభ్యుల వివరాలను సేకరిస్తున్నారని.. ప్రభుత్వం భయపెట్టే చర్యలు మానుకోవాలని ఉద్యోగ సంఘాలు డిమాండ్ చేశాయి.