కరోనా వైరస్ వ్యాప్తి ఎక్కువగా ఉన్న చైనా, ఇటలీ, అమెరికా దేశాల బాధితుల డేటాను పరిశీలిస్తే.. 19 ఏళ్ల లోపు చిన్నారుల్లో కేవలం 2-5 శాతం మంది మాత్రమే కరోనా ఇన్‌ఫెక్షన్‌ను ఎదుర్కొంటున్నట్లు నిపుణులు చెబుతున్నారు. ఇందులో కూడా 90 శాతం పిల్లల్లో సాధారణ లక్షణాలేనని తెలిపారు. కేవలం 10 శాతం మందిలో కొంత తీవ్రత ఎక్కువగా కన్పించిందని ఇందుకు అనేక కారణాలు దోహదం చేశాయని పేర్కొంటున్నారు. అది కూడా ఏడాదిలోపు పిల్లలపైనే ఎక్కువ ప్రభావం చూపుతుందంటున్నారు. మన వద్ద కూడా పెద్దల్లో వైరస్ వ్యాప్తి పెరుగుతుండడంతో ఆ ప్రభావం చిన్నపిల్లలపై కన్పిస్తోంది. ప్రస్తుతం పెద్దలతోపాటు ఇరవై మంది వరకు పిల్లలు వివిధ ఆసుపత్రుల్లో చికిత్స పొందుతున్నారు. వీరి ఆరోగ్యం నిలకడగా ఉందని వైద్యులు పేర్కొంటున్నారు. అయితే కేసులు పెరుగుతున్న దృష్ట్యా.. ఈ విషయంలో తగిన జాగ్రత్తలు తీసుకోవాలని నిపుణులు సూచిస్తున్నారు.
పిల్లలపై ప్రభావం తక్కువే...
కరోనా సోకిన చిన్నారుల్లో 90 శాతం మందిలో తక్కువ, మధ్యస్తంగా లక్షణాలు కన్పిస్తాయి. జలుబు, దగ్గు, జ్వరం ఉంటుంది. చికిత్సతో తగ్గిపోతుంది. కేవలం 10 శాతం పిల్లల్లో కొన్నిసార్లు ఐసీయూ చికిత్సలు అవసరమవుతాయి. కరోనా బాధితులను పరిశీలిస్తే చిన్నారుల మరణాల రేటు చాలా తక్కువ.
* అధ్యయనాల ప్రకారం శరీరంలోని ఏసీఈ రెస్పెక్టర్‌ బ్లాకర్‌ ఎంజైమ్‌పై కరోనా వైరస్ ప్రభావం చూపుతుంది. అయితే 19 ఏళ్లలోపు పిల్లలు, యువకుల్లో ఈ ఏంజైమ్‌ అభివృద్ధి పెద్దలతో పోల్చుకుంటే తక్కువ. పిల్లల్లో కరోనా ప్రభావం ఎక్కువ చూపక పోవడానికి ఇది కూడా ఒక కారణమని పరిశోధకులు అంచనా వేస్తున్నారు.
* ముఖ్యంగా కరోనా వైరస్ ఊపిరితిత్తులపై తీవ్ర ప్రభావం చూపుతుంది. అప్పటికే ఆస్తమా, కేన్సర్‌ తదితర సమస్యలతోపాటు పొగతాగే వారిలో ముప్పు ఎక్కువ. పిల్లల్లో ఇలాంటి అనారోగ్య ఇబ్బందులు చాలా తక్కువ. అంతేకాక పెద్దలతో పోల్చితే పిల్లల్లో ఊపిరితిత్తుల పనితీరు మెరుగ్గా ఉంటుంది. స్వతహాగా ఉన్న వ్యాధి నిరోధక శక్తి కూడా వైరస్‌ను అడ్డుకుంటుంది.