CM JAGAN:భారత స్టార్‌ షట్లర్‌ కిదాంబి శ్రీకాంత్, ఇండియన్‌ డెఫ్ ఒలింపిక్స్ టెన్నిస్‌ ప్లేయర్‌ షేక్‌ జాప్రిన్‌ను ముఖ్యమంత్రి జగన్ అభినందించారు. అంతర్జాతీయ వేదికలపై రాష్ట్ర ప్రతిష్టను వెలుగెత్తిచాటడంపై ప్రశంసించారు. షేక్‌ జాప్రిన్‌ అర్హతలను బట్టి ప్రభుత్వ ఉద్యోగం ఇవ్వాలని అధికారులను సీఎం ఆదేశించారు. జాతీయ, అంతర్జాతీయ వేదికలపై ప్రతిభను చాటిన ఆంధ్రప్రదేశ్ క్రీడాకారులకు ఇచ్చే నగదు ప్రోత్సాహకం ఇవ్వాలన్నారు.
శ్రీకాంత్, జాఫ్రిన్‌ను ముఖ్యమంత్రి ఘనంగా సన్మానించారు. ప్రభుత్వం తరపున వారికి అవసరమైన అన్ని సౌకర్యాలు అందుబాటులో ఉంచాలని సీఎంవో అధికారులకు సూచించారు. ప్రభుత్వం క్రీడాకారులకు పూర్తి సహాయ సహకారాలు అందిస్తూ, వారిని ప్రోత్సహిస్తుందన్నారు. రాబోయే రోజుల్లో ఇదే స్ధాయిలో గెలిచి ఆంధ్రప్రదేశ్కు పేరు, ప్రఖ్యాతలు తీసుకురావాలని ఆకాంక్షించారు. ఏపీ బ్యాడ్మింటన్‌ అసోసియేషన్‌ తరపున సీఎం జగన్‌కు బ్యాడ్మింటన్‌ కిట్ను ప్రెసిడెంట్‌ ముక్కాల ద్వారకానాథ్‌ అందజేశారు. ఈ కార్యక్రమంలో మంత్రి రోజా, శాప్‌ చైర్మన్‌ బైరెడ్డి సిద్ధార్ధ్‌ రెడ్డి, శాప్‌ స్పోర్ట్స్ ఆఫీసర్‌ జూన్‌ గ్యాలియట్ పాల్గొన్నారు.