తక్షణ సాయం కోరుతూ కేంద్ర ప్రభుత్వానికి సీఎం జగన్ లేఖ

కరోనాతో దెబ్బతిన్న రాష్ట్రాన్ని వరదలు మరింత కుంగదీశాయని..,ఆర్థికంగా ఆదుకోవాలని సీఎం జగన్‌ కేంద్రాన్ని కోరారు. భారీ వర్షాలు, వరదలతో రాష్ట్రంలో 4 వేల 450 కోట్ల మేర నష్టం వాటిల్లిందని కేంద్ర హోంమంత్రి అమిత్‌ షాకు లేఖ రాశారు. సాధారణ పరిస్థితులు నెలకొల్పేందుకు ముందుగా వెయ్యి కోట్లు మంజూరు చేయాలని విజ్ఞప్తి చేశారు.

భారీ వర్షాలు, వరదలతో నష్టపోయిన ఏపీని ఆదుకోవాలంటూ...ముఖ్యమంత్రి వైఎస్ జగన్ కేంద్రహోంమంత్రి అమిత్‌ షాకు లేఖ రాశారు. వ్యవసాయ శాఖతోపాటు వివిధ శాఖల ప్రాథమిక అంచనాల మేరకు రాష్ట్రంలో 4 వేల 450 కోట్ల రూపాయల మేర నష్టం వాటిల్లగా..,14 మంది ప్రాణాలు కోల్పోయినట్టు లేఖలో వివరించారు. తక్షణ సాయంగా 2,250 కోట్లు రాష్ట్రానికి ఇవ్వాలని, వరద ప్రభావిత ప్రాంతాల్లో సహాయక చర్యలు చేపట్టి...సాధారణ పరిస్థితి నెలకొల్పేందుకు తక్షణ సాయంగా వెయ్యి కోట్లు మంజూరు చేయాలని కోరారు.

మొత్తం 9 జిల్లాలు తీవ్రంగా ప్రభావితం అయ్యాయని..,పంట నష్టంతోపాటు రవాణా నిలిచిపోయిన పరిస్థితి ఉందని సీఎం లేఖలో వివరించారు. తీవ్రవాయుగుండం కారణంగా..రాష్ట్రంలో అక్టోబరు 9 నుంచి 13వరకూ భారీ వర్షాలు కురిశాయని తెలిపారు. ఒక్క రోజే తూర్పుగోదావరి జిల్లా ఐ.పోలవరంలో 26.5 సెంటిమీటర్లు, కాట్రేనికోనలో 22.8 సెంటిమీటర్లు, పశ్చిమ గోదావరి జిల్లా ఆకివీడులో 20.5 సెంటిమీటర్ల వర్షం కురిసిందని వివరించారు. ఎగువన తెలంగాణా, మహారాష్ట్రల్లోనూ కురిసిన వర్షాలతో కృష్ణా నదికి వరదలు వచ్చాయని పేర్కొన్నారు.

ఆగస్టు, సెప్టెంబరు నెలల్లో కురిసిన వర్షాలకుతోడు ప్రస్తుతం సంభవించిన వరదతో నష్టం మరింత పెరిగిందని, రహదారులు దెబ్బతిన్నాయని..అమిత్‌షాకు రాసిన లేఖలో సీఎం ఆవేదన వ్యక్తంచేశారు. విద్యుదుత్పత్తిపైనా వర్షాలు ప్రభావం చూపాయన్నారు. కొవిడ్ కారణంగా నష్టపోయిన రాష్ట్రాన్ని వరదలు మరింత దారుణంగా మార్చాయని పేర్కొన్నారు. రాష్ట్ర ప్రజలకు ఉపశమనం కల్పించేందుకు కేంద్రం అందించే చేయూత ఎంతో అవసరమని వివరించారు. వరద నష్టం అంచనా వేసేందుకు కేంద్ర బృందాన్ని కూడా పంపించాలని కోరారు.

ఇదీచదవండి