'జగన్ నియంతృత్వ పోకడలకు హైకోర్టు తీర్పు చెంపపెట్టు'

వ్యవస్థలను పాడుచేయాలనే ఆలోచనను జగన్ విరమించుకోవాలని భాజపా రాష్ట్ర ఉపాధ్యక్షుడు విష్ణువర్ధన్​రెడ్డి వ్యాఖ్యానించారు. ఎన్నికల కమిషనర్ వ్యవహారంలో హైకోర్టు తీర్పును ఆయన స్వాగతించారు.

ఎన్నికల కమిషనర్ వ్యవహారంలో హైకోర్టు తీర్పును భాజపా రాష్ట్ర ఉపాధ్యక్షుడు విష్ణువర్ధన్​రెడ్డి స్వాగతించారు. స్థానిక ఎన్నికల్లో అవకతవకలు, ఎన్నికల కమిషనర్‌ మార్పు విషయంలో మొదటి నుంచి తాము రాష్ట్రప్రభుత్వ నిరంకుశ వైఖరిని వ్యతిరేకిస్తూనే ఉన్నామన్నారు. రాజ్యాంగ విరుద్దమైన చర్యలకు, నియంతృత్వ పోకడలకు శుక్రవారం నాటి హైకోర్టు తీర్పు చెంపపెట్టుగా అభివర్ణించారు. రాజ్యాంగానికి ఏ స్థాయి వారైనా కట్టుబడి ఉండాల్సిందేనని స్పష్టం చేశారు.

ఇకనైనా వైకాపా ప్రభుత్వం నియంతపాలన విడిచిపెట్టి ప్రజల కోసం పనిచేస్తే మంచిదని విష్ణువర్ధన్ రెడ్డి సూచించారు. వ్యవస్థలను పాడుచేయాలనే ఆలోచనను జగన్ విరమించుకోవాలన్నారు. ఎన్నికల కమిషనర్‌గా మరో సారి నియమితులైన నిమ్మగడ్డ రమేశ్​కుమార్‌ను ఆయన అభినందించారు. స్థానిక సంస్థల ఎన్నికల ప్రక్రియ నిష్పక్షపాతంగా జరిగేలా చూడాలని విజ్ఞప్తి చేశారు. పార్టీలతో సంబధం లేకుండా రాజ్యాంగ సంస్థలు, వాటి విలువలు చిరస్థాయిగా ఉండాలని అభిప్రాయపడ్డారు.

ఇదీచదవండి: ఎల్జీ పాలిమర్స్ కంపెనీని ఎత్తివేయాలి:రామకృష్ణ