వినాయకచవితి వేడుకలు బహిరంగ వేదికలపై నిర్వహించడానికి వీల్లేదంటూ తీసుకున్న ఏకపక్ష నిర్ణయం వెనుక ‘కుట్రకోణం’ దాగి ఉందని అనుమానిస్తున్నామని భాజపా రాష్ట్ర అధ్యక్షుడు సోము వీర్రాజు పేర్కొన్నారు. ‘కరోనా సమయంలో స్థానిక సంస్థల ఎన్నికలు నిర్వహించాలని మీ పార్టీ భావించలేదా..? కరోనా అదుపులో ఉందని రాష్ట్ర ప్రభుత్వమే చెబుతోంది. అలాంటప్పుడు.. చవితి వేడుకలకు వైరస్‌ ఎందుకు అడ్డంకిగా కనిపిస్తోంది’ అని శనివారం సీఎం జగన్కు రాసిన లేఖలో ప్రశ్నించారు.
హిందూ వ్యతిరేక విధానాల కొనసాగింపులో భాగంగానే వేడుకలను రద్దు చేసినట్లు హిందూ సమాజం భావిస్తోందని, కరోనా నిబంధనలకు అనుగుణంగా వేడుకలను నిర్వహిస్తే అభ్యంతరమేమిటని ప్రశ్నించారు. కేంద్ర మార్గదర్శకాలకు అనుగుణంగా వేడుకలకు అనుమతించాలని డిమాండు చేశారు. ‘హిందూ ధర్మం, దేవాలయాలు, సంస్కృతిపై కొనసాగుతున్న దాడులు, వాటిపై ప్రభుత్వం అనుసరిస్తున్న వైఖరి హిందూ మతంపై వివక్షను బహిర్గతం చేస్తోంది.