BJP leaders 'అన్నదాతలకు భరోసా ఇవ్వని రైతు భరోసా కేంద్రాలు ఎందుకు..?'

రాష్ట్ర ప్రభుత్వ వైఖరిపై భాజపా నేతలు సోము వీర్రాజు(BJP AP president somu veerraju), జీవీఎల్ నరసింహరావు(BJP MP GVL narasimharao) ఆగ్రహం వ్యక్తం చేశారు. మిల్లర్లతో కుమ్మక్కై మంత్రులు, ఎమ్మెల్యేలు రైతులను దోచుకుంటున్నారని సోము వీర్రాజు ఆరోపించారు. రైతులకు ఇవ్వాల్సిన ధాన్యం బకాయిలను(grain dues) ప్రభుత్వం ఎందుకు చెల్లించడం లేదని ప్రశ్నించారు. కేంద్ర పథకాలకు రాష్ట్ర ప్రభుత్వ స్టిక్కర్లు వేసుకుంటున్నారని జీవీఎల్ నరసింహరావు విమర్శించారు.

మిల్లర్లతో కుమ్మక్కై ఎమ్మెల్యేలు, మంత్రులు రైతులను దోచుకుంటున్నారని భాజపా రాష్ట్ర అధ్యక్షుడు సోము వీర్రాజు ఆరోపించారు. రైతుల బకాయి సొమ్ములు చెల్లించకపోవడం వెనుక పెద్ద కుంభకోణం దాగి ఉందని విమర్శించారు. విజయవాడలో నిర్వహించిన భాజపా కార్యవర్గ సమావేశంలో మాట్లాడిన ఆయన.. ప్రభుత్వం ధాన్యం బకాయిలు ఎందుకు చెల్లించట్లేదని ప్రశ్నించారు. పౌరసరఫరాల శాఖలో రూ.3 కోట్లతో ఒక డీఎం మంత్రికి ఇల్లు కట్టించి ఇచ్చాడని వెల్లడించారు. అన్నదాతలకు భరోసా ఇవ్వని రైతు భరోసా కేంద్రాలు ఎందుకని ప్రశ్నించిన సోము వీర్రాజు.. రెండేళ్ల నుంచి తుంపర సేద్యానికి నిధులు ఇవ్వట్లేదని పేర్కొన్నారు.

రైతుల సంక్షేమాన్ని విస్మరించారు...

రాష్ట్రంలో రైతుల సంక్షేమాన్ని ప్రభుత్వం పట్టించుకోవడం లేదని భాజపా ఎంపీ జీవీఎల్ నరసింహారావు అన్నారు. రాజకీయాలకు ఇచ్చిన ప్రాధాన్యత అన్నదాతలకు ఇవ్వడం లేదని ఆవేదన వ్యక్తం చేశారు. కేంద్రం ఇచ్చే మద్దతు ధర రాష్ట్రంలో అమలు కావడం లేదన్న జీవీఎల్.. కేంద్ర పథకాలకు రాష్ట్ర ప్రభుత్వ స్టిక్కర్లు వేసుకుంటున్నారని మండిపడ్డారు. పథకాలు అమలు చేయమంటే ప్రచారం చేసుకుంటున్నారని ఎద్దేవా చేశారు.

ఇవీచదవండి.