హైదరాబాద్​నుంచి విజయవాడకు 'ఆర్టీసీ తరలింపు' పూర్తి

హైదరాబాద్​లోని బస్ భవన్ ను ఏపీఎస్​ఆర్టీసీ దాదాపు ఖాళీచేసింది. ప్రభుత్వ చొరవపై... సిబ్బంది, కార్మికులు హర్షం వ్యక్తం చేస్తున్నారు.

హైదరాబాద్​లోని బస్ భవన్ ను ఏపీఎస్​ఆర్టీసీ దాదాపు ఖాళీచేసింది. ట్రస్టుల విభజన సమస్యలు, సహా పలు సాంకేతిక సమస్యలతో అక్కడే ఉండిపోయిన ఎస్​ఆర్​బీసీ, ఎస్​బీటీ ట్రస్టులు, లీగల్ సెల్ విభాగాలను ఉన్నతాధికారులు విజయవాడకు రప్పించారు.

విజయవాడ నుంచే ఆర్టీసీ ఉద్యోగుల పీఎఫ్ ట్రస్ట్ సేవలు

హైదరాబాద్ బస్​ భవన్ లో ఉన్న పీఎఫ్ ట్రస్టు కార్యాలయాన్నీ అమరావతికి తరలించారు. ఇకపై ఏపీఎస్​ఆర్టీసీ కార్మికులు ఉద్యోగులు పీఎఫ్ సంబంధిత క్లెయిమ్​ల పరిష్కారంకోసం హైదరాబాద్​కు వెళ్లాల్సిన అవసరం ఉండదు. విజయవాడలోని ఆర్టీసీ ప్రధాన కార్యాలయం నుంచే పీఎఫ్ ట్రస్ట్ కార్యకలాపాలు జరగనున్నాయి. రాష్ట్ర విభజన అనంతరం ఆఘమేఘాల మీద ఆర్టీసీ ప్రధాన కార్యాలయాన్ని, సిబ్బందిని అప్పట్లో ప్రభుత్వం తరలించింది. 2016 జూలైలో విజయవాడలోని ఆర్టీసీ హౌస్​కు ప్రధాన కార్యాలయం తరలివచ్చింది. పండిట్ నెహ్రూ బస్ స్టేషన్​లో అదనంగా భవనాలను ఆర్టీసీ నిర్మించింది. మిగిలిన పలు ప్రభుత్వ కార్యాలయాల తరలింపునకు ఏర్పాట్లు చేసి తనవంతు సహకరించింది. ప్రస్తుతం హైదరాబాద్​లోని బస్ భవన్ లో ఏపీఎస్​ఆర్టీసీ...దూరప్రాంత విభాగం మాత్రమే, అతి కొద్ది మంది సిబ్బందితో కొనసాగుతోంది. విభజనతో వచ్చిన సమస్యలను క్రమంగా పరిష్కరించుకుంటూ వెళ్లడం... అన్ని విభాగాలను వేగంగా రాష్ట్రానికి తరలిరావడం, రాజధానిలో అన్ని సదుపాయాలు కల్పిస్తున్న ప్రభుత్వ చొరవపై... ఆర్టీసీ ఉద్యోగులు సంతోషం వ్యక్తం చేస్తున్నారు.