రాష్ట్రంలో కార్పొరేషన్ ఛైర్మన్ల పరిస్ధితిపై లిడ్క్యాప్ ఛైర్మన్ కాకుమాను రాజశేఖర్ అసంతృప్తి వ్యక్తం చేశారు. కార్పొరేషన్ ఛైర్మన్లు ఉత్సవ విగ్రహాలుగా కూర్చోవాలని అధికారులు చెబుతున్నారని సంచలన వ్యాఖ్యలు చేశారు. విజయవాడ తుమ్మలపల్లి కళాకళాక్షేత్రంలో ప్రభుత్వం నిర్వహించిన అంబేడ్కర్ జయంతి వేడుకల్లో పాల్గొన్న ఆయన.. అధికారులెవవరూ ఛైర్మన్లను లెక్క చేయటం లేదని ఆవేదన వ్యక్తం చేశారు. ఉత్సవ విగ్రహాలుగా, ఏసీ రూముల్లో కూర్చునేందుకు తాము రాలేదని అన్నారు. ప్రజలకు సంక్షేమ ఫలాలు అందించేందుకే వచ్చామన్నారు. రాజ్యంగం కల్పించిన ఫలాలు దళితులు, ఎస్సీ, ఎస్టీ, బీసీ మైనార్టీలకు అందటం లేదన్నారు. పేదవారి కోసం అవసరమైతే చట్టాలను సవరించాలని డిమాండ్ చేశారు.
లిడ్క్యాప్లో రూ.కోటి టర్నోవర్ ఉన్న వారికే కాంట్రాక్టు పనులు చేసేందుకు అవకాశం ఉందని.., దీని వల్ల బోర్డులో ఒక్క దళితుడికీ అవకాశం లేని పరిస్ధితి ఉందన్నారు. బోర్డులో దళితులను నియమించాలని తాను పట్టుబట్టడంతోనే దళితులను నియమించారని చెప్పారు. కొందరు ఉన్నతాధికారులు ఛైర్మన్లకు సహకరించటం లేదని.., ఇకపై అలాంటి అధికారుల ఆటలు సాగవని హెచ్చరించారు. చట్టాలని అడ్డుపెట్టుకుని ఎవరికైనా అన్యాయం చేస్తే సహించేది లేదని తేల్చి చెప్పారు.