తిరుపతిలోని అమరరాజా బ్యాటరీస్ యూనిట్‌ను అక్కడి నుంచి మరోచోటుకు తరలించేలా ఆదేశాలివ్వాలంటూ తాము హైకోర్టును కోరామని అటవీశాఖ కార్యదర్శి, కాలుష్య నియంత్రణ మండలి కార్యదర్శి జీఎస్‌ఆర్‌కేఆర్‌ విజయ్‌ కుమార్‌ తెలిపారు. మంగళవారం ఆయన విజయవాడలో విలేకరులతో మాట్లాడారు. ఆ సంస్థ పర్యావరణానికి పునరుద్ధరించలేనంతగా నష్టం కలిగించిందని పేర్కొన్నారు. తనిఖీల్లో గుర్తించిన లోపాల్ని సరిచేసుకునేందుకు వారికి రెండు నెలలు అవకాశం ఇచ్చినా.. అవేవీ సరిదిద్దలేదని చెప్పారు. ఈ నేపథ్యంలో ఆ కంపెనీకి క్లోజర్‌ ఆర్డర్‌ ఇవ్వగా.. వారు హైకోర్టును ఆశ్రయించారని వివరించారు.
పరిశ్రమలో వినియోగించే నీటిని శుద్ధి చేయకుండా బయటకు వదులుతున్నారని, సీసం కలిసిన ఆ నీటినే మొక్కల పెంపకం, ఇతర అవసరాల కోసం వినియోగిస్తున్నట్లు తమ తనిఖీల్లో వెల్లడైందని తెలిపారు. ఈ నీరు సమీపంలోని జల వనరుల్లోకి వెళ్లి, అక్కడి పర్యావరణానికి తీవ్ర నష్టం కలిగిస్తోందని చెప్పారు. పర్యావరణానికి హాని కలిగించే పెట్టుబడుల గురించి ఆలోచించటం మానవజాతి మనుగడకే ప్రమాదకరమన్నారు. కంపెనీలు మూసేయాలన్నది ప్రభుత్వ ఆలోచన కాదని.. పర్యావరణానికి హాని కలగకుండా ఉత్పత్తి చేయించాలనేదే ప్రభుత్వ ఉద్దేశమని పేర్కొన్నారు.