రాష్ట్రంలో కరోనా క్రమంగా తీవ్రరూపు దాలుస్తోంది. ఇప్పటికే ప్రపంచంలోని పలుదేశాల్లో పెరుగుతున్న కేసులు భయాందోళనలకు గురి చేస్తున్నాయి. మనదేశంలోని కొన్ని రాష్ట్రాల్లో మూడో దశ మొదలైందని నిపుణులు హెచ్చరిస్తున్న నేపథ్యంలో రాష్ట్రంలోనూ కేసుల పెరుగుదల ఆందోళన కలిగిస్తోంది. గడిచిన 24 గంటల్లో కొత్తగా 434 మందికి వైరస్‌ సోకినట్లు నిర్ధారణ అయింది.
మరోపక్క కొత్తగా నాలుగు ఒమిక్రాన్ కేసులు వెలుగులోకి రాగా ఆ వేరియంట్‌ మొత్తం కేసులు 28కి చేరాయి. బుధవారం నాటికి రాష్ట్రవ్యాప్తంగా 1,848 క్రియాశీలక కేసులున్నాయి. పలు ఆసుపత్రుల్లో 280 మంది చికిత్సలు పొందుతున్నారు. వీరిలో కొందరు వెంటిలేటర్లపై ఉండగా మరికొందరు ఆక్సిజన్‌ వార్డుల్లో చికిత్స పొందుతుండటం గమనార్హం.
1.17% నుంచి 1.32%కు పాజిటివిటీ రేటు
రాష్ట్రంలో కరోనా పాజిటివిటీ రేటు పెరుగుతోంది. మంగళవారం 1.17% (334 కేసులు) ఉంటే బుధవారానికి 1.32%కి చేరింది. గత ఏడాది నవంబరు తర్వాత ఈ స్థాయి పెరుగుదల ఇదే తొలిసారి. మంగళవారం ఉదయం 9 నుంచి బుధవారం ఉదయం 9 గంటల మధ్య 32,785 నమూనాల్ని పరీక్షించారు. అత్యధికంగా చిత్తూరు జిల్లాలో 68 కేసులొచ్చాయి. విశాఖపట్నం జిల్లాలో 63 మందికి, కృష్ణా జిల్లాలో 61 మందికి కరోనా సోకింది. 24 గంటల్లో కరోనా వల్ల ఒక్క మరణమూ లేకపోవడం కాస్త ఊరట కలిగిస్తోంది.
కొత్తగా బుధవారం మరో నాలుగు ఒమిక్రాన్ కేసులు నమోదయ్యాయి. గతనెల 18-27 మధ్య అమెరికా, యూకే నుంచి ప్రకాశం జిల్లాకు ముగ్గురు వచ్చారు. వీరిలో ఒకరు ఏడేళ్ల బాలుడు. వీరికి కరోనా పాజిటివ్‌ రావడంతో నమూనాలను జీనోమ్‌ స్వీకెన్సింగ్‌ కోసం పంపగా ఒమిక్రాన్‌గా తేలినట్లు వైద్య, ఆరోగ్యశాఖ బుధవారం ఓ ప్రకటనలో తెలిపింది. విదేశాల నుంచి వచ్చిన కుటుంబ సభ్యులతో సన్నిహితంగా మెలిగిన గుంటూరుకు చెందిన 14 ఏళ్ల బాలికకూ ఒమిక్రాన్ సోకింది. వీటితో కలిపి రాష్ట్రంలో ఒమిక్రాన్ కేసుల సంఖ్య 28కి చేరింది.
40 వేల మంది రాక
గత ఏడాది నవంబరు 15 నుంచి ఇప్పటివరకు సుమారు 40వేల మంది వేర్వేరు దేశాల నుంచి రాష్ట్రంలోని వివిధ జిల్లాలకు చేరుకున్నారు. కెన్యా, దక్షిణాఫ్రికా, కువైట్, నైజీరియా, సౌదీ అరేబియా, అమెరికా, యూఏఈ, ఒమన్, సౌత్‌ సుడాన్, యూకే తదితర దేశాల నుంచి ఇక్కడికి వచ్చారు.