మద్యం అమ్మకాలపై విచారణ వచ్చే వారానికి వాయిదా

కరోనా సమయంలో మద్యం అమ్మకాలు ఆపాలని కోరుతూ వేసిన పిటిషన్‌పై విచారణను హైకోర్టు వచ్చే వారానికి వాయిదా వేసింది. ప్రభుత్వం దశలవారీ మద్యనిషేధం అంటూనే మద్యం విక్రయించడం సరికాదని పిటిషనర్‌ తరుఫు న్యాయవాది డీఎస్ ఎన్వీ ప్రసాద్ బాబు కోర్టులో వాదన వినిపించారు.

కొవిడ్ సమయంలో రాష్ట్రంలో మద్యం అమ్మకాలపై దాఖలైన పిటిషన్​పై హైకోర్టులో నేడు విచారణ జరిగింది. ప్రభుత్వం ఒక వైపు దశల వారిగా మద్యనిషేధం అని చెబుతూ కరోనా సమయంలో మద్యం విక్రయించడం సరి కాదని పిటిషనర్ తరఫు న్యాయవాది డీఎస్ ఎన్వీ ప్రసాద్ బాబు వాదించారు. మూడు రోజులుగా కోవిడ్ బాధితుల సంఖ్య పెరుగుతోందని న్యాయస్థానం దృష్టికి తీసుకెళ్లారు.

మద్యం అమ్మకాలకు సంబంధించి తమిళనాడు ప్రభుత్వం దాఖలు చేసిన పిటిషన్​లో సుప్రీంకోర్టు స్టే ఇచ్చిందని ధర్మాసనం దృష్టికి తీసుకువచ్చారు. సుప్రీంకోర్టు ఉత్తర్వులకు సంబంధించిన కాపీని తమ ముందు ఉంచాలని ప్రభుత్వాన్ని కోర్టు ఆదేశించింది. తదుపరి విచారణను వచ్చే వారానికి వాయిదా వేశారు.

ఇదీ చూడండి:అంబులెన్స్​లో తరలిస్తున్న మద్యం పట్టివేత