ఉక్కు ఉద్యమం: 'విశాఖ స్టీల్ ప్లాంట్​ను ప్రైవేటీకరణ కానివ్వం'

విశాఖ ఉక్కు ప్రైవేటీకరణకు వ్యతిరేకంగా విశాఖలో భారీ బహిరంగ సభ నిర్వహించారు. స్టీల్ ప్లాంట్​ను ఎట్టిపరిస్థితుల్లో ప్రైవేటీకరణ కానివ్వమని నేతలు ఈ సభలో స్పష్టం చేశారు. ఉక్కు పరిరక్షణ పోరాట కమిటీ, రాజకీయ పార్టీల నేతలు హాజరయ్యారు.

విశాఖ ఉక్కు ప్రైవేటీకరణకు వ్యతిరేకంగా స్టీల్ ‌ప్లాంట్ ప్రధాన రహదారిపై బహిరంగ సభ నిర్వహించారు. సభలో వైకాపా, తెదేపా, కమ్యూనిస్టు, జనసేన నేతలు పాల్గొన్నారు. ఉక్కు ఉద్యమానికి మద్దతుగా వేల సంఖ్యలో కార్మికులు హాజరయ్యారు.

ప్రధాని మోదీ, కేంద్ర హోం మంత్రి అమిత్‌షా వల్లే ఇబ్బందులు ఎదురవుతున్నాయని.. సీపీఐ రామకృష్ణ చెప్పారు. అధికార, ప్రతిపక్ష నేతలంతా ఒకే వేదికపైకి వచ్చారని.. కలిసి పోరాటం చేసినా కేంద్రం వెనక్కి తగ్గడం కష్టమని అభిప్రాయపడ్డారు. ఉక్కు పరిశ్రమ అంశాన్ని తేలిగ్గా తీసుకోవద్దని సీఎం జగన్‌ను కోరుతున్నామన్నారు. లేఖ రాసి ఊరుకుంటే కేంద్రం ఏమీ స్పందించదన్న రామకృష్ణ.. విశాఖ ఉక్కు కోసం అందరం కలిసి దిల్లీ వెళ్దామన్నారు. దిల్లీని గడగడలాడించి విశాఖ ఉక్కును కాపాడుకుందామని చెప్పారు.

ఉక్కు పరిశ్రమ ప్రైవేటీకరణ జరగనివ్వం. విభజన హామీల గురించి కేంద్రాన్ని నిలదీయాలి. కడప ఉక్కు పరిశ్రమ, ప్రత్యేక హోదా ఏమయ్యాయి?. పరిశ్రమ రక్షణ బాధ్యతను రాష్ట్ర ప్రభుత్వం స్వీకరించాలి.

- సీపీఎం రాష్ట్ర కార్యదర్శి మధు

ఎందరో ప్రాణత్యాగం చేస్తేనే ఉక్కు పరిశ్రమ వచ్చిందని కార్మిక సంఘాలు స్పష్టం చేశాయి. ఐదుగురు ప్రధానులు స్టీల్‌ప్లాంట్‌ను ప్రభుత్వ రంగంలోనే ఉంచారని తెలిపాయి. కార్మికులు ఎవరూ జీతాల కోసం ఉద్యమం చేయడం లేదని స్పష్టం చేశాయి.

మెట్రోపాలిటన్‌ సిటీగా విశాఖ మారిందంటే ఉక్కు పరిశ్రమే కారణమని తెదేపా నేత బండారు సత్యనారాయణ మూర్తి అన్నారు. త్యాగాలను పంచిన ఉక్కు పరిశ్రమ భూమి అమ్మేందుకు వీల్లేదని స్పష్టం చేశారు. ప్రధాని మోదీ, సీఎం జగన్‌ కలిసి మన హక్కులు కాపాడాలని కోరారు. ఉక్కు పరిశ్రమ ప్రైవేటీకరణను ఎట్టిపరిస్థితుల్లో ఒప్పుకోమని బండారు పేర్కొన్నారు.

ఇదీ చదవండి:'సమస్యాత్మక గ్రామాలున్నప్పటికీ... అంతా సహకరించారు'