అగ్నిపథ్ రద్దు చేయాలంటూ.. వివిధ విద్యార్థి సంఘాలు చేపట్టిన ఆందోళనలు అరెస్టులకు దారితీశాయి. విశాఖలో అల్లర్లను అరికట్టేందుకు ముందస్తు చర్యగా.. రాష్ట్ర నిరుద్యోగ పోరాట సమితి అధ్యక్షుడు సమయం హేమంత్ కుమార్ను పోలీసులు అదుపులోకి తీసుకున్నారు. అగ్నిపథ్‌ని రద్దు చేయాలనే డిమాండ్‌తో విశాఖ రైల్వే స్టేషన్‌కి ర్యాలీగా వెళ్తున్న విద్యార్థి సంఘాల నాయకులను సైతం పోలీసులు అరెస్ట్ చేశారు. ఎటువంటి అవాంఛనీయ సంఘటనలు చోటుచేసుకోకుండా రైల్వే స్టేషన్ ముందు భారీ పోలీసు బందోబస్తు ఏర్పాటు చేయడంతో నిరసనకారుల ప్రయత్నం విఫలమైంది.
కడప కలెక్టరేట్‌కు ర్యాలీగా వస్తున్న విద్యార్థి సంఘాలను పోలీసులు అడ్డుకున్నారు. అనుమతి లేదని, వెనక్కి వెళ్లిపోవాలని కోరారు. ఐనా వెనక్కి తగ్గగపోవడంతో పోలీసులు వారిని అరెస్ట్ చేసి స్టేషన్కు తరలించారు. అగ్నిపథ్‌ను విరమించుకోవాలని.. అనంతపురంలో ఏఐఎస్ఎఫ్ నాయకులు ఆందోళనకు దిగారు. పోలీసులు వారిని అడ్డుకునే యత్నం చేయగా.. విద్యార్థి సంఘం నేతలు కార్యాలయం వైపు దూసుకెళ్లారు. పోలీసులు వారిని అదుపులోకి తీసుకొని పోలీస్ స్టేషన్కు తరలించారు.