పెళ్లైన 24 గంటల్లోనే.. మరో పెళ్లి చేసుకున్న యువతి

ఒకరిని ప్రేమించింది. ప్రేమ విషయం ఇంట్లో చెప్పలేక పెద్దలు కుదిర్చిన పెళ్లికి అంగీకరించింది. పెళ్లి చేసుకుంది. ఇంతలో అక్కడికి తాను ప్రేమించిన యువకుడు వచ్చాడు. తర్వాత ఏమైందంటే..

తెలంగాణలోని నల్గొండ జిల్లా కనగల్ మండలంలో వింత ఘటన జరిగింది. ముందుగా పెద్దలు కుదిర్చిన వివాహం చేసుకున్న మౌనిక అనే ఓ యువతి.. మర్నాడు తాను మనసిచ్చిన యువకుడిని మనువాడింది.

కనగల్ మండలం శాబ్దుల్లాపూర్ గ్రామానికి చెందిన మౌనికకు దేవరకొండకు చెందిన ఓ యువకుడితో పెద్దలు పెళ్లి నిశ్చయించారు. ఈనెల 12న వారి వివాహం జరిగిపోయింది.

అప్పుడే అసలు కథ మొదలైంది. మౌనిక తనకు వరుసకు మామయ్య అయ్యే రాజేశ్​తో కొన్నేళ్లుగా ప్రేమాయణం సాగిస్తోంది. ఈ విషయం తెలియని కుటుంబ సభ్యులు మౌనికకు మరో వ్యక్తితో వివాహం నిశ్చయించారు. ప్రేమ విషయం పెద్దలకు చెప్పే ధైర్యం లేని మౌనిక పెళ్లికి అంగీకరించింది. వివాహమూ చేసుకుంది. కట్​చేస్తే పెళ్లయిన కాసేపటికి అక్కడికి రాజేశ్​ వచ్చాడు. అతడిని చూసిన మౌనిక.. వెంటనే అతడిని గట్టిగా పట్టుకుని ఏడ్చేసింది. ఫలితంగా మౌనికను వివాహమాడిన యువకుడు పెద్దల ముందు పంచాయతీ పెట్టాడు. రంగంలోకి పోలీసులూ దిగారు. పలు చర్చల తర్వాత తాము ఈ పెళ్లిని రద్దు చేసుకుంటున్నామని మగ పెళ్లివారు తేల్చి చెప్పారు. దాంతో ఈనెల 13న రాజేశ్​, మౌనికలు మళ్లీ వివాహం చేసుకున్నారు.

ఇదీ చదవండి:ప్రత్యర్థుల్లా ఉండాలి.. విరోధులుగా కాదు: గోరంట్ల