చిత్తూరు జిల్లాపై కరోనా మహమ్మారి పంజా విసురుతోంది. పాజిటివ్ కేసులు నిత్యం వేల సంఖ్యలో వస్తున్నాయి. కొవిడ్ బారిన పడి హోం ఐసోలేషన్ లో ఉంటున్న వారంతా కఠినమైన పరిస్థితులు ఎదుర్కొంటున్నారు. ఇంటి నుంచి బయటకి రాలేక.. అర్ధాకలితో కాలం గడుపుతున్నారు. వీరి బాధలను చూసి తిరుపతిలోని ఆర్కేడ్‌ అపార్ట్మెంట్ వాసులు చలించారు. ఆకలితో ఉన్న వారి కడుపు నింపేందుకు అంతా ఒక్కటై కదిలారు.
ఆర్కేడ్‌ అపార్ట్ మెంట్ వాసి కొండలరావు తొలుత కొవిడ్ బాధితులకు సాయం చేయాలని భావించారు. తన ఆలోచనను మిగిలిన అపార్ట్ మెంట్ వాసులతో పంచుకున్నారు. అందరూ కలిసి కొవిడ్ రోగులకు ఉచితంగా భోజనం అందించాలని నిర్ణయించారు. పాజిటివ్ వచ్చి హోం ఐసోలేషన్ లో ఉన్నవారు.. పాజిటివ్ రిపోర్ట్, ఇంటి అడ్రస్ వాట్సప్‌లో పెడితే.. మధ్యాహ్నం, రాత్రికి భోజనాన్ని వారికి పంపేలా ఏర్పాట్లు చేశారు. అలా మొత్తం 30 కుటుంబాలు కలిసి కొంతమొత్తం వేసుకుని సాయం చేస్తున్నాయి. పోషకాహారాన్ని స్వయంగా సిద్ధం చేసి రోగులకు అందిస్తున్నారు.