తిరుపతి ఉపఎన్నిక: తెదేపా విస్తృత ప్రచారం.. గెలుపే లక్ష్యంగా అడుగులు!

తిరుపతి ఉపఎన్నికల్లో తెదేపా వేగం పెంచింది. ప్రచారాన్ని విస్తృతం చేయడంతో పాటు గెలుపే లక్ష్యంగా పార్టీ శ్రేణులను సమాయత్తం చేస్తోంది. అధికార వైకాపా దౌర్జన్యాలకు ఎదురొడ్డి పోరాడుతున్న కార్యకర్తలకు బాసటగా పార్టీ నిలుస్తోందన్న సంకేతాలను పంపుతోంది. స్థానిక సంస్థల ఎన్నికల్లో పోటీ చేసిన అభ్యర్థులను సన్మానించడం ద్వారా ఉప ఎన్నికల్లో ఉత్సాహంతో పనిచేసేలా ప్రోత్సహిస్తోంది. స్థానిక అంశాలను ప్రస్తావిస్తూనే రాష్ట్ర వ్యాప్త సమస్యలను ప్రజలకు చేరువ చేసే లక్ష్యంతో ప్రచారాన్ని చేపట్టారు. తెదేపా ఆవిర్భావ దినోత్సవ వేడుకలు ఘనంగా నిర్వహించడం ద్వారా కార్యకర్తల్లో ఉత్సాహాన్ని నింపారు.

తిరుపతి ఉప ఎన్నికల్లో విజయం కోసం తెదేపా సర్వశక్తులు ఒడ్డుతోంది. అన్ని పార్టీల కంటే ముందే అభ్యర్థిని ప్రకటించడంతో పాటు నామినేషన్‌ ఘట్టాన్ని పూర్తి చేసిన తెదేపా.. ప్రచారాన్ని విస్తృతం చేసింది. రాష్ట్ర స్థాయి నేతలు తిరుపతి ఉప ఎన్నికపై ప్రత్యేక దృష్టి సారించారు. శాసన సభ్యుడు నిమ్మల రామానాయుడు ఉప ఎన్నికల బాధ్యుడిగా తిరుపతిలోనే మకాం వేసి ప్రచారాన్ని పర్యవేక్షిస్తున్నారు. లోక్‌సభ నియోజకవర్గ పరిధిలోని ఏడు శాసనసభ స్థానాల్లో స్థానిక నేతలు విస్తృతంగా ప్రచారం చేస్తున్నారు. అభ్యర్థి పనబాక లక్ష్మి.. స్థానిక నేతలతో కలిసి ప్రచారం లో పాల్గొంటున్నారు. మరో వైపు క్లస్టర్ స్థాయిలో కార్యకర్తలు ప్రచారాన్ని ముమ్మరం చేశారు.

నలభై సంవత్సరాల ఆవిర్భావ దినోత్సవాన్ని ఘనంగా నిర్వహించిన తెదేపా నేతలు.. ఉప ఎన్నికల్లో అనుసరించాల్సిన వ్యూహంపై పార్టీ శ్రేణులకు దిశానిర్దేశం చేశారు. తిరుపతి పవిత్రతను కాపాడటంలో రాష్ట్ర ప్రభుత్వం ఘోరంగా విఫలమైందని.. ఇదే అంశాన్ని ప్రజలకు వివరించాలని కార్యకర్తలకు సూచించారు. అమ్మ ఒడి పేరుతో సంక్షేమ పథకం అమలు చేశామంటున్న ప్రభుత్వం మద్యం మొదలు నిత్యావసరాల వరకు ధరలను పెంచడం ద్వారా సామాన్య ప్రజలకు దోపిడీ చేస్తోందని.. ఈ అంశాలను ప్రజలకు వివరించాలని కార్యకర్తలను నిర్దేశించారు.

ప్రముఖ నేతల భారీ ర్యాలీలు రోడ్‌షోలతో పాటు క్షేత్ర స్థాయిలో కార్యకర్తలు ఇంటింటా ప్రచారం నిర్వహిస్తున్నారు. పట్టణ, గ్రామీణ ప్రాంతాల్లో ప్రభుత్వ వైఫల్యాలను ప్రజలకు చేరువచేసేందుకు ప్రత్యేకంగా ప్రణాళిక రూపొందించి అమలు చేస్తున్నారు.

ఇదీ చదవండి:కడప ఉక్కు భాగస్వామికి ఆర్థిక కష్టాలు