తిరుపతి లోక్‌సభ ఉపఎన్నికలో ప్రచారం ఊపందుకుంది. అధికార, విపక్షాల మధ్య ఆరోపణలు, ప్రత్యారోపణలతో ప్రచారం వాడివేడిగా సాగుతోంది. బరిలో ఉన్న ప్రధాన పార్టీలు ఓటర్లను ప్రసన్నం చేసుకునే దిశలో ఎన్నో అంశాలను తెరపైకి తెస్తున్నాయి. ప్రధాన ప్రతిపక్షం తెదేపా.. కేంద్ర, రాష్ట్ర ప్రభత్వాల వైఫల్యాలను ప్రజలకు వివరిస్తూ విజయం కోసం తీవ్రంగా కృషి చేస్తోంది. రాష్ట్ర విభజనతో నవ్యాంధ్రప్రదేశ్‌లో ఉనికి కోల్పోయిన కాంగ్రెస్‌ పూర్వ వైభవం కోసం అత్యంత ప్రధానమైన అంశాలను ప్రజల్లోకి తీసుకెళుతోంది. మన్మోహన్‌సింగ్ ప్రధాన మంత్రిగా ఉన్న సమయంలో చిత్తూరు, నెల్లూరు జిల్లాల సరిహద్దులో మన్నవరం సమీపంలో దాదాపు ఆరు వేల కోట్ల రూపాయలతో ఏడు వందల ఎకరాల విస్తీర్ణంలో ఏర్పాటు చేసిన బెల్‌ విద్యుత్‌ ఉపకరణాల పరిశ్రమ మూతపడే దశకు చేరుకున్న తీరును ఓటర్లకు వివరిస్తోంది.
ప్రత్యక్షంగా ఐదు వేల మందికి, పరోక్షంగా 25 వేల మందికి ఉపాధి కల్పించాల్సిన పరిశ్రమ కేంద్ర, రాష్ట్ర ప్రభుత్వాల నిర్లక్ష్య వైఖరితోనే అవసాన దశకు చేరుకుందని ప్రతిపక్ష పార్టీలు ఆరోపిస్తున్నాయి. రెండో దశ విస్తరణ చేపట్టాల్సిన సమయంలో మన్నవరం పరిశ్రమలో ఏర్పాటు చేయాల్సిన యూనిట్లను గుజరాత్‌కు తరలించారని ఫలితంగా తిరుపతి లోక్‌సభ పరిధిలోని ప్రజలకు తీరని అన్యాయం జరిగిదంటూ ఆరోపణలు చేస్తున్నారు.
మన్నవరం తరహాలోనే దుగరాజపట్నం ఓడరేపు ఎన్నికల్లో ప్రధానమైన ప్రచార అంశంగా మారింది. నెల్లూరు జిల్లాలోని వాకాడు మండలం దుగరాజపట్నం సమీపంలో ఎనిమిది వందల ఎకరాల విస్తీర్ణంలో ఆరు వేల కోట్ల రూపాయలతో ఓడరేపు నిర్మాణానికి అప్పటి యూపీఏ ప్రభుత్వం 2012లో ప్రతిపాదన చేసింది. 2013లో కేబినెట్‌ ఆమోదం తెలిపింది. తదనంతర కాలంలో 2014 సంవత్సరంలో రాష్ట్ర విభజన జరగడంతో రాజధాని కోల్పోతున్న నవ్యాంధ్రప్రదేశ్‌కు న్యాయం చేసే లక్ష్యంతో దుగరాజపట్నం ఓడరేపు నిర్మాణాన్ని విభజన చట్టంలో రెండో అంశంగా పొందుపరిచారు.