కరోనా చికిత్స కోసం క్వారంటైన్ కేంద్రాలకు వచ్చే తితిదే ఉద్యోగులకు మెరుగైన సేవలు అందించాలని... జేఈవో సదాభార్గవి ఆదేశించారు. తితిదే ఉద్యోగులు, వారి కుటుంబ సభ్యులకోసం ఏర్పాటు చేసిన మాధవం క్వారంటైన్ కేంద్రాన్ని ఆమె తనిఖీ చేశారు. బెడ్లు, మందులు, పారిశుద్ధ్యం, వైద్యులు, సిబ్బంది అందుబాటు పరిస్థితులను ఆమె పరిశీలించారు. వైద్య సిబ్బందికి అందుబాటులో ఉన్న పీపీఈ కిట్లు, మాస్కులు, ఫేస్ షీల్డ్లను పరిశీలించారు.
కరోనా బారిన పడిన తితిదే ఉద్యోగులు, వారి కుటుంబ సభ్యులు త్వరగా కోలుకోవడానికి మందులు, పోషకాహారంతో పాటు యోగా తరగతులు ఏర్పాటు చేయాలని సిబ్బందికి దిశానిర్దేశం చేశారు. మాధవంలో అవసరమైన ఆక్సిజన్ నిల్వలు అందుబాటులో ఉంచుకోవాలని ఆదేశించారు. హోం క్వారంటైన్లో ఉన్న ఉద్యోగులకు కిట్స్ అందించి, వారి ఆరోగ్య పరిస్థితి ఎప్పటికప్పుడు తెలుసుకునే ఏర్పాట్లు చేయాలని ఆదేశించారు.