తిరుమలలో అన్యమత ప్రచారం... రాజకీయ దుమారం

తిరుమలలో అన్యమత ప్రచార ఉదంతం రాష్ట్రంలో రాజకీయ దుమారం రేపుతోంది. తిరుమలకు వెళ్లే బస్ టిక్కెట్లపై వేరే మతం మద్రణ ఉండటంపై భాజపా నేతలు తీవ్రంగా మండిపడుతున్నారు. దీనిపై భాజపా తీవ్ర అభ్యంతరం వ్యక్తం చేస్తూ... ప్రభుత్వంపై విమర్శనాస్త్రాలు సంధిస్తోంది. ఈ వ్యవహారంపై పాలకపక్షం స్పందించినా... బాధ్యులం తాము కాదంటూ... గత తెదేపా ప్రభుత్వంపై ఆరోపణలు చేశారు. దీనిపై ఆర్టీసీ సంస్థ ఎగ్జిక్యూటివ్ డైరెక్టర్ కోటేశ్వరరావు వివరణ ఇచ్చారు. గత ప్రభుత్వ సంక్షేమ పథకాలతోకూడిన ప్రకటనలతో ఈ టిక్కెట్లు పొరపాటున జారీ అయ్యాయని... అంతే తప్ప అన్యమత ప్రచారం కాదని వివరించారు.

రాష్ట్రంలో హిందూధర్మంపై దాడి జరుగుతోందని భాజపా రాష్ట్ర అధ్యక్షుడు కన్నా లక్ష్మీనారాయణ ట్విట్టర్‌లో పేర్కొన్నారు. విజయవాడలో గోవుల మృతి, శ్రీశైలంలో అన్యమతస్తులకు వ్యాపారాలు, ఇప్పుడు తిరుమలలో టికెట్ల వెనక ఇతర మతాల ప్రచారమే దీనికి ఉదాహరణ అని వ్యాఖ్యానించారు. వీటిపై ప్రభుత్వానికి సమాచారం లేదా.. తెలిసే జరుగుతోందా అని నిలదీశారు. ప్రభుత్వం ఇలాంటి చర్యలకు పాల్పడటం సరికాదని... దేశంలో అందరి మనోభావాలను గౌరవించాలని హితవు పలికారు.

తిరుమలలో ఆర్టీసీ బస్సు టిక్కెట్లపై అన్యమత ప్రచారంపై... తిరుపతి ఆర్టీసీ ఆర్‌ఎంకు భాజపా నేతలు వినతిపత్రం ఇచ్చారు. బాధ్యులైనవారిపై చర్యలు తీసుకోవాలని డిమాండ్ చేశారు. భక్తుల మనోభావాలు దెబ్బతీసేలా ప్రభుత్వ చర్యలు ఉన్నాయని ఆరోపించారు. అన్యమత ప్రచారాన్ని ఆపకపోతే ఉద్యమాన్ని తీవ్రం చేస్తామని హెచ్చరించారు. తిరుపతి ఆర్టీసీ బస్టాండ్‌ వద్ద భాజపా కార్యకర్తలు ఆందోళన చేశారు. ఆర్టీసీ టిక్కెట్లపై అన్యమత ప్రకటనలపై నిరసన వ్యక్తం చేశారు.

తిరుమలలో అన్యమత ప్రచారంపై రాష్ట్ర భాజపా వ్యవహారాల ఇన్‌ఛార్జ్‌ సునీల్‌ దేవధర్‌ స్పందించారు. బస్ టికెట్లపై జెరూసలేం యాత్ర గురించి ముద్రించడం సరికాదని హితవు పలికారు. ఇలాంటి చర్యలు తిరుమల శ్రీవారిని అవమానించడమేనని పేర్కొన్నారు. రావాలి ఏసు.. కావాలి ఏసు.. వైకాపా కొత్త నినాదమా? అని సునీల్ దేవధర్‌ ప్రశ్నించారు.

మంత్రుల స్పందన...
తిరుమల అన్యమత ప్రచార ఉదంతంపై దేవాదాయ శాఖ మంత్రి వెల్లంపల్లి శ్రీనివాస్ స్పందించారు. తిరుపతి నుంచి తిరుమల వెళ్లే బస్సు టికెట్లపై అన్యమత ప్రచారం చేశారంటూ... జరుగుతున్న వ్యవహారం ప్రభుత్వం దృష్టికి వచ్చిన వెంటనే విచారణకు ఆదేశించామన్నారు. ఆ టికెట్లు గత తెదేపా ప్రభుత్వ హయాంలో ముద్రించినట్లుగా తేలిందని చెప్పారు. నెల్లూరు డిపోలో ఉండాల్సిన టికెట్లు నిబంధనలకు విరుద్ధంగా తిరుపతి డిపోకు వెళ్లినట్లుగా గుర్తించామన్నారు. దీనిపై సమగ్ర దర్యాప్తు జరిపించి బాధ్యులపై చర్యలు తీసుకుంటామని వివరించారు.

టికెట్‌ రోల్స్ కాంట్రాక్టు ఇచ్చింది చంద్రబాబు ప్రభుత్వమేనని మంత్రి పేర్ని నాని చెప్పారు. టికెట్‌పై అన్యమత ప్రచారం గత ప్రభుత్వం తప్పు అని ఆరోపించారు. తమ ప్రభుత్వం అన్ని మతాలనూ గౌరవిస్తుందని స్పష్టం చేశారు. ఎవరి మనోభావాలూ దెబ్బతీసేలా తమ ప్రభుత్వం వ్యవహరించదని చెప్పారు. ఈ విషయం తెలిసిన వెంటనే ఆ రోల్స్ నిలుపుదల చేశామని వివరించారు. దీనికి బాధ్యులైన వారిపై కఠినచర్యలు తీసుకుంటాని స్పష్టం చేశారు. ప్రతి విషయాన్ని రాజకీయం చేయడం తెదేపా, భాజపాకు సరికాదన్నారు. ఆర్టీసీ ఎండీతో సమావేశమై పూర్తి వివరాలు చెబుతామని చెప్పారు.

ఆర్టీసీ ఉన్నతాధికారుల వివరణ...
తిరుమలలో బస్సు టిక్కెట్లపై అన్యమత ప్రచారం జరుగుతోందన్న ఆరోపణలపై ఆర్టీసీ ఎగ్జిక్యూటివ్ డైరెక్టర్ కోటేశ్వర రావు వివరణ ఇచ్చారు. గత ప్రభుత్వం అమలు చేసిన సంక్షేమ పథకాలపై మార్చిలో మైనార్టీ సంక్షేమ శాఖ ఓ ఏజెన్సీ ద్వారా తమకు ప్రకటనలు ఇచ్చారని తెలిపారు. 18 రకాల గత ప్రభుత్వ సంక్షేమ పథకాలతో పాటు జెరూసలేం పర్యటన ప్రకటన టిక్కెట్ కూడా జారీ అయిందన్నారు. ఇది ఉద్దేశపూర్వకంగా జరిగింది కాదన్నారు. ఈ వ్యవహారంపై విచారణకు ఆదేశించామని... బాధ్యులైన అధికారులపై చర్యలు తీసుకుంటామని తెలిపారు.

ఇదీ చదవండీ...