పోలీసుల శక్తియుక్తులు, ప్రతిభాపాటవాలకు వేదికగా భావిస్తున్న స్టేట్ డ్యూటీ పోలీస్ మీట్ ఘనంగా జరుగుతోంది. రెండో రోజు సైబర్ నేరాల నియంత్రణపై నిర్వహించిన సదస్సుల ద్వారా విద్యార్థులకు అవగాహన కల్పించారు. సైబర్ నేరగాళ్లు అవలంబిస్తున్న నూతన పంథాలను సీనియర్ పోలీసు అధికారులు వివరించారు. సైబర్ మోసాలకు గురికాకుండా మొబైల్, ల్యాప్ టాప్ వంటి ఎలక్ట్రానిక్ పరికరాలను భద్రంగా ఉంచుకోవాల్సిన తీరు, యాప్‌ల వినియోగం, ఇన్‌స్టాల్‌ చేసుకొని విషయంలో తీసుకోవాల్సిన జాగ్రత్తలను నిపుణులు వివరించారు. రుణయాప్ ల బారిన పడి ప్రజలు మోసపోకుండా జాగ్రత్త వహించాలని కోరారు.
సాంకేతిక పురోగతి, వ్యవస్థ బలోపేతం కోసం ఏపీ పోలీస్ ఇండియన్ ఇనిస్టిట్యూట్ ఆఫ్ డిజిటల్ టెక్నాలజీ, రాష్ట్ర నైపుణ్యాభివృద్ధి సంస్థలతో ఎంఓయూలను కుదుర్చుకుంది. ఈ మేరకు ఆయా సంస్థల ప్రతినిధులు, డీజీపీ గౌతం సవాంగ్ ఒప్పంద పత్రాలపై సంతకాలు చేశారు. సివిల్ సర్వీసెస్.... ప్రత్యేకించి పోలీస్ శాఖ గొప్పతనాన్ని వివరించేలా.. యువ ఐపీఎస్ అధికారులు, విద్యార్థులతో ముఖాముఖి కార్యక్రమాన్ని నిర్వహించారు. ఈ కార్యక్రమంలో డీజీపీ గౌతమ్ సవాంగ్ పాల్గొని యువతీయువకులతో ముచ్చటించారు.