GODAVRI FLOODS: గోదావరి వరద పోటుతో ప్రాణాలు అరచేతిలో పట్టుకుని కొండగుట్టలపైకి వెళ్లిన విలీన మండలాల ప్రజలు అవస్థలు పడుతున్నారు. పదిరోజులుగా విషసర్పాల మధ్య చీకట్లో బతుకెళ్లదీస్తున్నారు. తిండికి, తాగేనీటికి కటకటలాడుతున్నారు.
రికార్డు స్థాయిలో వచ్చిన గోదావరి వరద.. పశ్చిమగోదావరి జిల్లా వేలేరుపాడు మండలం మద్దిగట్ల గ్రామాన్ని పూర్తిగా ముంచెత్తింది. గ్రామస్తులంతా....సమీపంలోని కొండగుట్టలపైకి వెళ్లి ప్రాణాలు కాపాడుకున్నారు. అప్పటి నుంచి ఈ కొండగుట్టలపైనే గుడారాలు వేసుకుని బిక్కుబిక్కుమంటూ గడుపుతున్నారు. సాయంత్రమైతే చిమ్మచికట్ల మధ్య జీవిస్తున్నారు. ప్రభుత్వం అందించే అరకొర నిత్యావసరాలు, తాగునీళ్లు ఏమాత్రం సరిపోవడం లేదని వాపోతున్నారు. గత్యంతరం లేక వరద నీటిని వారంతా తాగుతున్నారు. గుట్టలపైకి వచ్చి పదిరోజులైనా తమను పట్టించుకోవడం లేదని వాపోతున్నారు.
వరద వల్ల పిల్లల చదువులు పూర్తిగా తుడుకుపెట్టుకుపోయాయి. ఊరిని వరద ముంచెత్తినప్పుడల్లా గ్రామస్థులు పాఠశాలలో తలదాచుకునేవారు. కానీ ఈసారి వచ్చిన వరద.. పాఠశాలను కూడా ముంచెత్తడంతో ఆ ప్రభావం విద్యార్థుల చదువులపై పడింది. మద్దిగట్ల ప్రాథమిక పాఠశాలను వరద నీరు చుట్టుముట్టడంతో.. అందులోని పుస్తకాలు, పరీక్ష పేపర్లు, ఒకటో తరగతి విద్యార్థులకు విద్యా కానుక కింద వచ్చిన పుస్తకాలు పాడైపోయాయి.
వరద ముంపును అంచనా వేయడంలో అధికారులు విఫలం కావడంతో కొన్ని గ్రామాల ప్రజలు చివరి క్షణంలో... కట్టుబట్టలతో పునరావాస కేంద్రాలకు చేరుకున్నారు. వేలేరుపాడు మండలం ఎర్రబోరు సహా పలు గ్రామాల ప్రజలు బండ్లబోరు వద్ద ఏర్పాటు చేసిన పునరావాస కేంద్రంలో తలదాచుకుంటున్నారు. ప్రభుత్వం తమకు ప్యాకేజీ ఇచ్చి పునరావాసం కల్పించాలని వారంతా వేడుకుంటున్నారు. ప్రతిసారీ వరద ముంచెత్తడం...పిల్లాజెల్లాతో కలిసి... గుట్టల్లో తలదాచుకునే పరిస్థితి తలెత్తకుండా ప్రభుత్వం త్వరగా ప్యాకేజీ ఇవ్వాలని బాధితులు కోరుతున్నారు.