ఆ చిలుక పలుకులు ముద్దులొలుకుతున్నాయి. చిన్నిచిన్ని మాటలతో అందరినీ అబ్బురపరుస్తోంది. మాజీ ఎంపీ హర్షకుమార్ రాజమహేంద్రవరంలోని తన ఇంట్లో ఏడేళ్లుగా ఆ చిలకను పెంచుతున్నారు. దానికి మాక్స్ అని పేరు పెట్టి అల్లారుముద్దుగా చూసుకుంటున్నారు. అలాగే మాటలు నేర్పించారు. మనం మాట్లాడే మాటలను అది కూడా అనుసరిస్తోంది. ఈ చిలక అమెజాన్ ప్రాంతానికి చెందినదని.. తమ ఇంట్లో భాగమైందని మాజీ ఎంపీ హర్షకుమార్ చెబుతున్నారు.
ఏడేళ్ల క్రితం ఈ మకావో చిలుకను ఆయన కుమారుడు తీసుకొచ్చారు. అప్పటినుంచి ఇది మాజీ ఎంపీ ఇంట్లో భాగమైంది. ఇది మనం మట్లాడే వివిధ మాటలు ఇట్టే పలుకుతుంది. హలో, బాగున్నారా, జై భీమ్, జై హర్ష, తోటకూర ఇలా పలు పదాలు వల్లె వేస్తూ.. అందరినీ ఆకట్టుకుంటోంది.