నిర్లక్ష్యం వద్దు... సేవాభావంతో పనిచేయండి: మంత్రులు

నెల్లూరు కలెక్టర్ కార్యాలయంలో కొవిడ్ నియంత్రణపై సమీక్షా సమావేశం నిర్వహించారు. ఇద్దరు మంత్రులు పాల్గొన్నారు. జిల్లా కలెక్టర్ తోపాటు, కొవిడ్ కేర్ సెంటర్ల నోడల్ అధికారులు హాజరయ్యారు. పాజిటివ్ వ్యక్తులకు అందుతున్న వైద్య సహాయంపై సుధీర్ఘంగా చర్చించారు. లోటుపాట్లు లేకుండా సేవా భావంతో వైద్యసేవలు అందించాలని అధికారులను ఆదేశించారు.

నెల్లూరు జిల్లాలోని 38 కొవిడ్ కేర్ సెంటర్లు, కొవిడ్ ఆసుపత్రుల అధికారులతో మంత్రులు సమీక్షా సమావేశం నిర్వహించారు. మంత్రులు మేకపాటి గౌతంరెడ్డి, అనిల్ కుమార్ యాదవ్, జిల్లా కలెక్టర్ చక్రధర్ బాబు, ప్రత్యేక అధికారులు, సంయుక్త కలెక్టర్లు ఈ సమావేశంలో పాల్గొన్నారు. ప్రధానంగా ఆక్సిజన్ సరఫరా​పై సుదీర్ఘ చర్చ సాగింది. జిల్లాకు కావలసిన ఆక్సిజన్, ఐసీయూ బెడ్స్, వెంటిలెటర్ల కొరత గురించి చర్చించారు.

కర్ణాటక, తమిళనాడు ప్రభుత్వాలతో మాట్లాడి కొరత తీరుస్తామని మంత్రి గౌతం రెడ్డి చెప్పారు. నెల్లూరు జీజీహెచ్​లో పనిచేసే జూనియర్ వైద్యులను ఐసీయూలో 12 గంటలు పని చేయిస్తున్నారని... దీనివల్ల ఇబ్బందులు పడుతున్నట్లు తన దృష్టికి వచ్చిందని పేర్కొన్నారు. 8 గంటలకు మించి పని చేయించవద్దని ఆదేశాలు ఇచ్చారు. కొన్ని ప్రైవేట్ ఆసుపత్రుల్లో బెడ్స్ కేటాయించడంలో ఇబ్బందులకు గురిచేస్తున్నారని... డబ్బుల కోసం పనిచేయవద్దని హెచ్చరించారు.

జిల్లాలోని 38 కొవిడ్ ఆసుపత్రుల్లో 332 ఐసీయూ బెడ్స్, 1343 ఆక్సిజన్ బెడ్స్, 1076 నాన్ ఆక్సిజన్ బెడ్స్​కు అనుమతి ఉందని జిల్లా కలెక్టర్ చక్రధర్ బాబు తెలిపారు. రోగులకు చికిత్స అందించడానికి రోజుకు 36.5 మెట్రిక్ టన్నుల ఆక్సిజన్ వినియోగిస్తున్నామని తెలిపారు. జిల్లాకు సరఫరా అవుతున్న ఆక్సిజన్ చాలడంలేదని నోడల్ అధికారులు సమావేశంలో మంత్రుల దృష్టికి తెచ్చారు.

ఇదీ చదవండి: