Goutham Reddy Passed away: సోమవారం ఉదయం గుండెపోటుతో కన్నుమూసిన మంత్రి గౌతమ్‌రెడ్డి భౌతిక కాయాన్ని నెల్లూరులోని ఆయన నివాసానికి తరలించారు. హైదరాబాద్‌లోని ఆయన నివాసం నుంచి ఈ ఉదయం... భౌతిక కాయాన్ని బేగంపేట విమానాశ్రయానికి తరలించారు. అక్కడినుంచి ప్రత్యేక విమానం ద్వారా నెల్లూరుకు తరలించారు. ప్రజల సందర్శనార్థం ఆయన నివాసంలోనే పార్థివదేహాన్ని ఉంచారు. తమ అభిమాన నాయకుడిని కడసారి చూసేందుకు భారీ ఎత్తున నాయకులు, కార్యకర్తలు, అభిమానులు గౌతమ్ రెడ్డి నివాసానికి తరలివచ్చి.. నివాళులర్పిస్తున్నారు. గౌతమ్‌రెడ్డి భౌతికకాయానికి హోంమంత్రి సుచరిత నివాళులర్పించారు. నెల్లూరులో మంత్రి గౌతమ్‌రెడ్డి భౌతికకాయ సందర్శన, అంత్యక్రియల ఏర్పాట్లను మంత్రి అనిల్ కుమార్‌ యాదవ్‌ పర్యవేక్షిస్తున్నారు. రేపు ఉదయం గౌతమ్ రెడ్డి అంతిమయాత్ర రోడ్డు మార్గంలో ఉదయగిరి వరకు జరుగుతుందన్నారు. అంత్యక్రియలకు సీఎం సహా మంత్రులు, ఎమ్మెల్యేలు హాజరవుతారని అనిల్ చెప్పారు.
సహచర మంత్రిని కోల్పోవడం పట్ల రాష్ట్ర మంత్రులు తీవ్ర సంతాపం తెలిపారు. నెల్లూరులోని గౌతమ్‌రెడ్డి నివాసం వద్ద ఆయన మృతదేహానికి మంత్రులు నివాళులు అర్పించారు. కుటుంబ సభ్యుడిని కోల్పోయినంత బాధగా ఉందని మంత్రులు సుచరిత, గుమ్మనూరి జయరాం ఆవేదన వ్యక్తం చేశారు. గౌతమ్ రెడ్డి మరణం వైకాపా, ప్రజలకు తీవ్ర లోటని రాజ్యసభ సభ్యులు మోపిదేవి వెంకటరమణా రావు అన్నారు. ఎప్పూడు చిరునవ్వుతో ఉండే సహచరుడు లేకపోవడం చాలా బాధగా ఉందని మంత్రి శంకరనారాయణ అన్నారు. వైకాపా శ్రేణులకు గౌతమ్ రెడ్డి మరణం తీవ్ర దిగ్భ్రాంతిని కలిగించిందని ఎమ్మెల్సీ లేళ్ల అప్పిరెడ్డి వ్యాఖ్యానించారు.
ఎయిర్‌ అంబులెన్స్‌లో తరలింపు..
మంగళవారం ఉదయం మంత్రి మేకపాటి గౌతమ్‌రెడ్డి భౌతికకాయాన్ని జూబ్లీహిల్స్‌లోని నివాసం నుంచి బేగంపేట ఎయిర్‌పోర్టుకు తీసుకొచ్చి... అక్కడినుంచి ఎయిర్‌ అంబులెన్స్‌లో నెల్లూరు తరలించారు. హైదరాబాద్‌ నుంచి బయల్దేరిన ఎయిర్‌ అంబులెన్స్‌లో గౌతమ్‌రెడ్డి కుటుంబసభ్యులతో పాటు ఏపీ మంత్రి ఆదిమూలపు సురేశ్, తితిదే ఛైర్మన్‌ వైవీ సుబ్బారెడ్డి ఉన్నారు. మరోవైపు ఇప్పటికే అమెరికా నుంచి గౌతమ్‌రెడ్డి కుమారుడు కృష్ణార్జున రెడ్డి బయల్దేరారు. ఈ సాయంత్రానికి ఆయన చేరుకునే అవకాశముంది. రేపు ఉదయం 11 గంటలకు ఉదయగిరిలోని మెరిట్స్‌ ఇంజినీరింగ్‌ కళాశాల సమీపంలో ప్రభుత్వ లాంఛనాలతో అంత్యక్రియలు నిర్వహించనున్నారు.