ACB: లంచం అడిగాడు.. అడ్డంగా బుక్కయ్యాడు

SI caught red handed : నిన్న శ్రీకాకుళం.. నేడు కర్నూలు.. జిల్లా ఎదైనా అవినీతి తిమింగళాలకు డబ్బు ఆశ తీరడం లేదు. ప్రభుత్వ ఉద్యోగులు రాష్ట్రవ్యాప్తంగా రోజు ఎక్కడో ఒకచోట అనిశా అధికారులకు దొరికిపోవడం పరిపాటిగా మారింది. కర్నూలు జిల్లాలో లంచం తీసుకుంటుండగా ఎస్​ఐను అనిశా అధికారులు రెడ్​హ్యాండెడ్​గా పట్టుకున్నారు.

SI caught red handed while accepting bribe : ఇరుగుపొరుగు వారి మధ్య ఇంటి స్థలం విషయమై ఘర్షణ జరిగింది. న్యాయం చేయాలంటూ పోలీసులను ఆశ్రయించాడు బాధితుడు. లక్ష రూపాయలు ఇస్తే న్యాయం చేస్తానని.. ఎస్​ఐ చెప్పాడు. విసిగిపోయిన బాధితుడు ప్రకాష్ అవినీతి నిరోధక శాఖ అధికారులకు సమాచారమిచ్చాడు. రంగంలో దిగిన అనిశా అధికారులు మాటువేసి కర్నూలు జిల్లా సి.బెళగల్​ ఎస్​ఐ శివాంజల్​ను రెడ్​ హ్యాండెడ్​గా పట్టుకున్నారు.

కోడుమూరు నియోజకవర్గం సి. బెళగల్ మండలానికి చెందిన ప్రకాష్ ఆచారి అనే వ్యక్తి.. తన ఇంటి పక్క స్థలం వివాదంలో పోలీసులను ఆశ్రయించాడు. ఎస్సై శివాంజల్​ను స్థల వివాదం పరిష్కరించాలని కోరాడు. స్థలానికి సంబంధించి డాక్యుమెంట్లను ఎస్ఐకి చూపించాడు. అయితే స్థల వివాదం పరిష్కరించాలంటే లక్ష రూపాయలు ఇవ్వాలని డిమాండ్ చేశాడు. దీంతో కంగుతిన్న ప్రకాష్ ఆచారి.. ఆ సొమ్ము ఇచ్చేందుకు మొదట నిరాకరించాడు. ఆ తర్వాత అవినీతి నిరోధక శాఖ అధికారులను సంప్రదించి.. విషయాన్ని వారి దృష్టికి తీసుకెళ్లాడు. ఏసీబీ సూచన మేరకు ప్రకాష్ ఆచారి ఎస్ఐ శివాంజల్​కు డబ్బు ఇచ్చేందుకు అంగీకరించాడు. ప్రకాష్ నుంచి ఎస్ఐ రూ 50 వేలు లంచం తీసుకుంటుండగా అప్పటికే అక్కడ మాటు వేసిన ఏసీబీ అధికారులు.. ఎస్ఐ శివాంజల్​ను రెడ్ హ్యాండెడ్​గా పట్టుకున్నారు. మొదట ఆ సొమ్ము తనది కాదంటూ రోడ్డుపై పారేసిన ఎస్ఐ.. ఆ తర్వాత తప్పును అంగీకరించక తప్పలేదు.

ఇవీ చదవండి: