శ్రీశైలంలో నూతన భవన సముదాయం.. తీరనున్న వసతి కష్టాలు

శ్రీశైలంలో భక్తుల సౌకర్యార్థం కోసం నూతన వసతి సముదాయం రూపుదిద్దుకుంటోంది. ప్రతిష్ఠాత్మకంగా నిర్మిస్తోన్న భవన సముదాయాన్ని వచ్చే ఆగస్ట్​ నాటికి అందుబాటులోకి తీసుకురావాలని అధికారులు సమాయత్తమవుతున్నారు. ఈ నూతన సముదాయం పూర్తైతే భక్తులకు వసతి కష్టాలు తీరనున్నాయి.

కర్నూలు జిల్లా శ్రీశైలం ఆలయానికి వచ్చే భక్తుల రద్దీని దృష్టిలో పెట్టుకుని అధికారులు నూతన వసతి సముదాయాన్ని నిర్మిస్తున్నారు. గణేష్​ సదన్​ పేరిట దాదాపు రూ.43 కోట్లతో నాలుగు బ్లాక్​ల్లో 224 గదుల నిర్మాణం సాగుతోంది. వసతి సముదాయంలోని సీ బ్లాక్​లో రిసెప్షన్, రెస్టారెంట్ సదుపాయాలు కల్పించనున్నారు. వాహనాల పార్కింగ్​ కోసం ఐదెకరాలు స్థలాన్ని కేటాయించారు. అంతర్గత రహదారులు, పచ్చని చెట్లను పెంచి పార్కింగ్​ను తీర్చిదిద్దనున్నారు. ద్వాదశ జ్యోతిర్లింగ క్షేత్రం కావడం వల్ల దేశం నలుమూలల నుంచి శ్రీశైలానికి అధిక సంఖ్యలో భక్తులు తరలి వస్తుంటారు. ఈ నూతన సముదాయంతో యాత్రికుల వసతి కష్టాలు తీరనున్నాయి.

దాతలకు 45 రోజులు వసతి ఉచితం

నూతన వసతి సముదాయంలో ఒక్కో గదికి దాతలు రూ.10 లక్షల విరాళం ఇవ్వాలని దేవస్థానం అధికారులు కోరారు. విరాళం ఇచ్చిన దాతకు ఏడాదిలో 45 రోజులు ఉచితంగా వసతి కల్పించనున్నారు. దాత తరఫున వచ్చే వారికి నామమాత్రం రుసుముతో వసతి కల్పిస్తామని అధికారులు తెలిపారు.

ఇదీ చదవండి: