నేను చిన్నప్పుడు ఎస్టీ... ఇప్పుడు బీసీ: మంత్రి జయరాం

వాల్మీకి సామాజిక వర్గానికి చెందిన ప్రజలు రాష్ట్రంలో కష్టాలు ఎదుర్కొంటున్నారని మంత్రి గుమ్మనూరు జయరాం అన్నారు. వారిని ఎస్టీ జాబితాలో చేర్చేందుకు ప్రయత్నిస్తామని తెలిపారు.

వాల్మీకిగా పుట్టినందుకు గర్విస్తున్నానని రాష్ట్ర కార్మిక శాఖ మంత్రి గుమ్మనూరు జయరాం అన్నారు. కర్నూలులో ఆదివారం నిర్వహించిన వాల్మీకి ఆత్మీయ సన్మాన సభలో ఆయన పాల్గొని ప్రసంగించారు. వాల్మీకులను ఎస్టీ జాబితాలో చెర్చేందుకు కృషి చేస్తానని మంత్రి గుమ్మనూరు జయరాం అన్నారు. కర్ణాటకలో వాల్మీకీలను ఎస్టీల్లో చేర్చారని చెప్పారు. బళ్లారిలో చదువుతున్న తన కుమారుడు అక్కడ ఎస్టీగా ఉన్నాడని.... రాష్ట్రంలో మాత్రం తాను బీసీగా ఉన్నానని మంత్రి తెలిపారు. తాను కూడా ఆరో తరగతి నుంచి పదో తరగతి వరకు పక్క రాష్ట్రంలో చదువుకున్నానని మంత్రి వెల్లడించారు. అప్పుడు తనకు ఎస్టీ సర్టిఫికేట్ వచ్చిందని గుర్తు చేసుకున్నారు. కేంద్రంపై ఒత్తిడి తెప్పించి వాల్మీకీలను ఎస్టీలుగా మార్చేందుకు తన వంతు ప్రయత్నం చేస్తానని మంత్రి జయరాం పేర్కొన్నారు.