కరోనా వ్యాప్తి నేపథ్యంలో రాష్ట్ర ప్రభుత్వం ప్రకటించిన లాక్డౌన్ను ఉల్లంఘిస్తే కఠిన చర్యలు తీసుకుంటామని కర్నూలు పోలీసులు హెచ్చరించారు. ఇప్పటికే బస్సులు, దుకాణాలు మూతపడ్డాయి. ప్రయాణికులు లేక బస్టాండ్ వెలవెలబోతోంది. ఆటోలు ఇష్టా రాజ్యంగా తిరుగుతుండటంతో ఆటో డ్రైవర్లకు పోలీసులు కౌన్సిలింగ్ ఇచ్చారు. రేపటి నుంచి రోడ్లపైకి వస్తే కేసులు నమోదు చేస్తామని హెచ్చరించారు. అలాగే ప్రజలు కూడా ఇళ్లకే పరిమితమవ్వాలని పోలీసులు విజ్ఞప్తి చేశారు. అత్యవసరమైతే తప్ప బయటకు రావద్దని సూచించారు. కరోనా వ్యాప్తిని అరికట్టేందుకు అందరూ ఏకం కావాలని కోరారు.
'రోడ్లపైకి వచ్చారంటే కఠిన చర్యలు తప్పవు'