ప్రయాణికులకు మంచి సేవలు అందించాలని సిబ్బందిని ఆర్టీసీ ఎండీ ఆర్పీ ఠాగూర్ ఆదేశించారు. కడప జిల్లా పర్యటనలో భాగంగా.. తొలుత ఒంటిమిట్ట రామాలయాన్ని సందర్శించి ప్రత్యేక ప్రార్థనలు చేశారు. రూ. 3 కోట్లతో కడపలో నిర్మిస్తున్న 30 పడకల ఆర్టీసీ ఆసుపత్రిని పరిశీలించారు. నిర్మాణం గురించి అడిగి తెలుసుకుని.. అక్కడ మొక్కలు నాటారు.
కడప ఆర్టీసీ బస్టాండ్ను ఠాగూర్ తనిఖీ చేసి.. సంస్థ గ్యారేజీని పరిశీలించారు. కార్మికులతో మాట్లాడి.. వారి సమస్యలను అడిగి తెలుసుకున్నారు. సాయంత్రం పులివెందులకు వెళ్లి.. అక్కడ కోట్లాది రూపాయలతో నిర్మిస్తున్న బస్టాండ్ను పరిశీలిస్తారు. రాత్రికి కడపలో బసచేసి రేపు ఆర్టీసీ జోనల్ కార్యశాలకు వెళతారు.