సీఎంవో ఆదేశాల మేరకు వారంలో సమస్య పరిష్కరిస్తామని ఎస్పీ హామీ ఇచ్చారు. నా సమస్యపై సీఎం కార్యాలయం కూడా ఎస్పీకి ఫోన్ చేసి ఆరా తీసింది. 2009లోనే భూమిని మా కుటుంబం రిజిస్ట్రేషన్ చేసుకుంది. వైకాపా నేత తిరుపాల్‌రెడ్డి కుటుంబం భూమి ఆక్రమించి రిజిస్ట్రేషన్ చేసుకున్నారు. సీఐ కొండారెడ్డిపై కూడా చర్యలు తీసుకుంటామని తెలియజేశారు. -అక్బర్ బాషా, బాధితుడు
‘నంద్యాలలో మైనారిటీ కుటుంబం మాదిరి సెల్ఫీ వీడియో తీస్తున్నా. కడప జిల్లా దువ్వూరు మండలం ఎర్రబల్లిలో నాకున్న ఎకరన్నర భూమిని వైకాపా నేత తిరుపేలరెడ్డి కుటుంబం ఆక్రమించి రిజిస్ట్రేషన్ చేయించుకుంది. ఈ వ్యవహారం కోర్టులో నడుస్తోంది. శుక్రవారం సాయంత్రం మైదుకూరు గ్రామీణ సీఐ కొండారెడ్డి మమ్మల్ని పోలీసుస్టేషన్‌కు పిలిపించి బెదిరించారు. తిరుపేలరెడ్డి చెప్పినట్లు వినకపోతే ఎన్‌కౌంటర్‌ చేస్తానని హెచ్చరించారు. సీఎం జగన్‌ సర్‌.. ఇదెక్కడి అన్యాయం సర్‌. మీ పాలనలో పోలీసులు ఎలా వ్యవహరిస్తున్నారో చూడండి. నేను కూడా వైకాపా కార్యకర్తనే. ఈ వీడియో మీకు చేరుతుందనే ఆశిస్తున్నా. సోమవారం సాయంత్రంలోగా న్యాయం జరగకపోతే మా నలుగురు కుటుంబీకులం ఆత్మహత్య చేసుకుంటాం. మా శవాలను చూసైనా మనసు కరుగుతుందని ఆశిస్తున్నా సర్‌..’ ఇది కర్నూలు జిల్లా చాగలమర్రికి చెందిన అక్బర్‌బాషా కన్నీరుపెడుతూ శుక్రవారం రాత్రి 11.30కు సామాజిక మాధ్యమాల్లో పోస్టు చేసిన సెల్ఫీ వీడియో. విస్తృత ప్రచారమైన ఈ సంఘటన వివరాలివి.
భూమిపై కోర్టులో కేసుంది...!
అక్బర్‌బాషా కుటుంబం దువ్వూరు మండల సమీపంలోని కర్నూలు జిల్లా చాగలమర్రిలో నివసిస్తోంది. సర్వేనంబరు 325లో ఎకరన్నర భూమిని తన భార్య అప్సానాను పెంచిన తల్లి కాశీంబీ 2009లో దానవిక్రయం కింద రిజిస్ట్రేషన్ చేయించి ఇచ్చారని అక్బర్‌బాషా చెబుతున్నారు. భూమి కాశీంబీ పేరుతో అనువంశికంగానే ఉందని భావించి 2012లో వైకాపా నేత తిరుపేలరెడ్డి ఇందులో ఎకరం భూమి ఆక్రమించుకున్నారని తెలిపారు. ఈ భూమిని తిరుపేలరెడ్డి తన కుమారుడు విశ్వేశ్వర్‌రెడ్డి పేరుతో రిజిస్ట్రేషన్ కూడా చేయించుకున్నారంటూ మైదుకూరు సివిల్‌ కోర్టులో తాము వేసిన వ్యాజ్యం కొనసాగుతోందని అక్బర్‌బాషా వివరించారు. ఇదే క్రమంలో తమ కుటుంబాన్ని శుక్రవారం సాయంత్రం మైదుకూరు గ్రామీణ పోలీసుస్టేషన్‌కు పిలిపించారని తెలిపారు. తాజాగా తిరుపేలరెడ్డి కుటుంబం ఈ పొలంలో నాట్లు వేయించిందని అక్బర్ ఆరోపించారు. దీన్ని తట్టుకోలేక ఇంటికి వెళ్తూ కుందూ నదిలో దూకాలని నిర్ణయించుకున్నామని, ఇద్దరు పిల్లలుండడంతో ఇంటికి వెళ్లి ఆలోచించామని అక్బర్‌బాషా దంపతులు తెలిపారు. తమకు న్యాయం జరుగుతుందని ఆశిస్తున్నామని కడప ఎస్పీ కార్యాలయంలో శనివారం విలేకరుల సమావేశంలో అభిప్రాయపడ్డారు.
ఒప్పందం రద్దు..
2009లో చేసిన దాన విక్రయ ఒప్పందాన్ని కాశీంబీ రద్దు చేసుకుని తిరుపేలరెడ్డి కుమారుడికి ఎకరం భూమి విక్రయించారు. అనంతరం 2012లో న్యాయస్థానంలో కేసు దాఖలైనప్పటినుంచి ఈ భూమి సేద్యం కావడం లేదు. సుమారు ఏడాది కిందట తీర్పు వచ్చాక తిరుపేలరెడ్డి తన బంధువుకు ఈ భూమిని కూడా విక్రయించారు. తాజాగా వారు సేద్యానికి సిద్ధమవడంతో మళ్లీ వివాదమేర్పడింది.
బలవంతంగా సంతకాలు: కాశీంబీ
‘అప్సానా నా పెంపుడు కుమార్తె కాదు. ఆమె నా సోదరుడి కుమార్తె. ఎకరన్నర భూమికి, అక్బర్‌బాషా కుటుంబానికి సంబంధం లేదు. నాకు మత్తుమందిచ్చి బలవంతంగా పత్రాలపై లోగడ సంతకాలు పెట్టించుకున్నారు. అక్బర్‌బాషా చెప్పేవన్నీ అవాస్తవాలు. భూమికి సంబంధించి అసలు పత్రాలు నా వద్దే ఉన్నాయి’ అని కాశీంబీ కడప ప్రెస్‌క్లబ్‌లో విలేకరులకు తెలిపారు.