పిల్లలతో బాక్సులు మోయించిన వాచ్​మెన్​.. చూసినా పట్టించుకోని పోలీసులు!

పిల్లలకు విద్యాబుద్ధులు నేర్పాల్సిన ప్రదేశం ఒకటి.. అదే బాలల హక్కులను కాపాడాల్సిన చోటు మరొకటి.. ఈ రెండు ప్రాంతాల్లోనూ విద్యార్థులు స్వేచ్ఛగా, హాయిగా.. ఏ బెరుకు, భయంలేకుండా ఉంటారంటారు. కానీ ఆ చోటనే బాలలు పనివాళ్లుగా మారారు! అది చూసినా హక్కులను రక్షించాల్సిన వారు మౌనంగా ఉండిపోయారు..!

గుంటూరు జిల్లా దుగ్గిరాల ఉన్నత పాఠశాలలో బాక్సులను పిల్లలతో మోయించడం కలకలం రేపింది. పదో తరగతి ప్రశ్నపత్రాలు తెచ్చిన అనంతరం ఖాళీ బాక్సులను ప్రధానోపాధ్యాయులు.. పోలీస్ స్టేషన్​లో పెట్టాలని కాపలాదురుడికి చెప్పి వెళ్లిపోయారు. ఆ వాచ్​మెన్​ శుక్రవారం సాయంత్రం పాఠశాల ఆవరణలో ఆటలాడుకుంటున్న కొంతమంది పిల్లలను పిలిచి... వాటిని పోలీస్ స్టేషన్​లో పెట్టమని చెప్పాడు. పిల్లలు బాక్సులను తీసుకెళ్లి పోలీస్ స్టేషన్​ పెట్టారు. బాలల హక్కులు కాపాడాల్సిన పోలీసులు ఈ దృశ్యాలను చూస్తూ ఏమీ అనకపోవడం మరో ఆశ్చర్యాన్ని కలిగించింది.

ఈ ఘటనపై స్పందించిన ఏంఈవో కాజా శ్రీనివాసరావు.. పిల్లలతో పెట్టమని చెప్పలేదని ఆ పనిని కాపలాదారుడికి చెప్పామని చెప్పారు. ఈ వ్యవహారంపై విచారణ చేసి చర్యలు తీసుకుంటామని తెలిపారు. పోలీసులు సైతం వాచ్​మెన్​పై చర్యలు తీసుకోవాలని.. విద్యాశాఖ అధికారులకు లేఖ రాశారు.

ఈ ప్రభుత్వం మారదా? : ఈ విషయంపై తెదేపా జాతీయ ప్రధాన కార్యదర్శి నారా లోకేష్ మండిపడ్డారు. ఆ దృశ్యాలు చూస్తే ఈ ప్రభుత్వం ఇంక మారదా? అనిపించిందని ధ్వజమెత్తారు. బాలల భవిష్యత్తు గురించి మాట్లాడే అర్హత ఈ పాలకులకు ఉందా..? అని నిలదీశారు. పోలీసులకు, అధికారులకు బాలల హక్కుల గురించి అవగాహనలేకపోవడం బాధాకరమన్నారు.

ఇదీ చదవండి: టెన్త్ ప్రశ్నపత్రం లీకేజీ.. పోలీసుల అదుపులో ప్రధానోపాధ్యాయుడు