గుంటూరు జీజీహెచ్లో మరో అధునాతన వైద్య పరికరం అందుబాటులోకి వచ్చింది. మూత్ర సంబంధిత వ్యాధుల నిర్ధరణ కోసం యూరాలజీ విభాగంలో 35 లక్షల రూపాయల వ్యయంతో 'యూరో డైనమిక్స్ స్టడీ మిషన్'ను ఏర్పాటు చేశారు. గుంటూరు జీజీహెచ్ సూపరింటెండెంట్ డాక్టర్ ప్రభావతి ఈ వైద్య పరికరాన్ని లాంఛనంగా ప్రారంభించారు.
మూత్రాశయ సమస్యలు, ప్రొస్టేట్ గ్రంధి శస్త్రచికిత్సల సమయంలో ఈ పరికరం ద్వారా కచ్చితత్వంతో వ్యాధి నిర్ధరణ చేస్తారు. రాష్ట్రవ్యాప్తంగా ప్రభుత్వ ఆసుపత్రుల్లో ఇలాంటి మిషన్ ఏర్పాటు చేయడం ఇదే తొలిసారని వైద్యులు తెలిపారు. దీంతో పేద ప్రజలు వేలకు వేలు పెట్టి బయట పరీక్షలు చేయించుకునే ఆర్ధికభారం తప్పుతుందని.. ఈ అవకాశాన్ని ప్రజలు సద్వినియోగం చేసుకోవాలని సూపరింటెండెంట్ ప్రభావతి కోరారు.