వైకాపాకు మద్దతుగా ఆత్మీయ సమ్మేళనం..హాజరైన తెదేపా అభ్యర్థి!
ఎన్నికల నేపథ్యంలో గుంటూరు నగరంలో నిర్వహించిన ఓ సమావేశంలో ఆసక్తికర ఘటన చోటు చేసుకుంది. అధికార పార్టీకి చెందిన అభ్యర్థులకు మద్దతుగా నగరంలో ఆర్యవైశ్యుల ఆత్మీయ సమ్మేళనం నిర్వహించారు. అదే సామాజిక వర్గానికి చెందిన 35వ వార్డులో తెదేపా తరపున పోటీ చేస్తున్న బాబు సమావేశానికి హాజరయ్యారు. పార్టీ కండువా వేసుకుని సమావేశాన్ని చివరి వరకూ తిలకించారు. సమ్మేళనం ముగింపు సమయంలో తనకు మాట్లాడేందుకు అవకాశం ఇవ్వాలని కోరారు. అందుకు వేదికపై ఉన్న అతిథులతో పాటు నిర్వాహకులు వ్యతిరేకించారు. సమావేశానికి ఎందుకు వచ్చావంటూ ప్రశ్నించారు. ఈ క్రమంలో కొద్దిపాటి వాగ్వాదం తరువాత వివాదం సద్దుమణిగింది.