ప్రశ్న:రాష్ట్రంలో దళిత వర్గాలపై దాడులు పెరిగాయని ఇటీవలి ఘటనలు రుజువు చేస్తున్నాయి. ప్రతిపక్షాలు కూడా ఇదే విషయంపై ప్రభుత్వాన్ని విమర్శిస్తున్నాయి. దీనిపై మీరేమంటారు..?
జవాబు: రాష్ట్రంలో జరిగిన రెండు, మూడు ఘటనల్ని చూపి అలాంటి ప్రచారం చేయటం సరికాదు. తూర్పుగోదావరి జిల్లా సీతానగరంలో కారు వెళ్లి బైకుని ఢీకొట్టింది. దీనిపైన ఇరు వర్గాల వారు కేసులు పెట్టుకున్నారు. అయితే అక్కడ పోలీసులు అతిగా ప్రవర్తించారు. వారిపైన చర్యలు తీసుకోవటంతో పాటు కేసులు కూడా పెట్టారు. ఎక్కడా ప్రభుత్వం దాన్ని ఉదాసీనంగా లేదు. చీరాల ఘటనలో కూడా కిరణ్ అనే యువకుడు మాస్క్ లేకుండా బైక్పై వెళ్తున్నారు. పోలీసులు ఆపారు. మద్యం మత్తులో అతను ఇష్టం వచ్చినట్లు మాట్లాడారు. అక్కడ కూడా పోలీసులపై చర్యలు తీసుకున్నాం. ఈ రెండు ఘటనలు కూడా దళితులని జరగలేదు. అనుకోకుండా జరిగినవే. అయినా తప్పు చేసిన వారిపై చర్యలు తీసుకున్నాం.
ప్రశ్న: వైకాపాకు ఓట్లేసి గెలిపించిన దళిత వర్గాలపై ప్రభుత్వం కక్ష గట్టిందనే ఇతర రాజకీయ పార్టీల నేతలు విమర్శిస్తున్నారు. దీనికి ఏం సమాధానమిస్తారు..?
జవాబు: రాజకీయంగా ఏదో ఒక విమర్శ చేయాలని మాట్లాడుతున్నారు. దళితులపై దాడులు జరిగితే కఠిన చర్యలు ఉంటాయని ముఖ్యమంత్రి ఇప్పటికే చెప్పారు. కాబట్టి వీటిని కులాలకు జరిగిన విషయంగా భావించరాదు. ఐదుగురి ఎస్సీలకు మంత్రివర్గంలో ముఖ్యమైన శాఖలు కేటాయించారు. 60శాతానిపైగా వెనుకబడిన వర్గాల వారే మంత్రివర్గంలో ఉన్నారు. ఇంతమందికి చోటు కల్పించిన ఘనత ముఖ్యమంత్రి జగన్దే. పేద, బడుగు వర్గాలకు మంచి చేయాలనేది మా ప్రభుత్వ లక్ష్యం. సంక్షేమ పథకాల్లో కూడా అగ్రస్థానం వారిదే. కానీ కొందరు తప్పుడు ప్రచారం చేస్తున్నారు. ప్రజలు ఈ విషయాల్ని గమనించాలి.