గుంటూరు సర్వజనాస్పత్రిలో సత్వర స్పందన కరవు..!

కరోనా వేళ సాధారణ, అత్యవసర వైద్యం అందడం కష్టంగా మారుతోందనే ఆరోపణలు వెల్లువెత్తుతున్నాయి. కరోనా పరీక్ష తర్వాతే వైద్యం చేస్తామని చెబుతుండటం, ఓపీకి, కరోనా పరీక్షకు గంటల తరబడి సమయం తీసుకోవడం కొందరి ప్రాణాల మీదకు తెస్తోంది. గుంటూరు సర్వజనాస్పత్రిలో నిర్లక్ష్యధోరణి, పర్యవేక్షణ లోపంతో ప్రాణాలు పణంగా పెట్టాల్సిన పరిస్థితులు కన్పిస్తున్నాయి.

గుంటూరు సర్వజనాస్పత్రిలో కొవిడ్ చికిత్సలు, నాన్ కొవిడ్ చికిత్సలకు వేర్వేరుగా బ్లాకులు ఏర్పాటు చేశారు. కానీ కరోనా దెబ్బకు అత్యవసర, సాధారణ వైద్యసేవలు నామమాత్రంగా మిగిలాయి. రోడ్డు ప్రమదాల్లో గాయపడినవారు, గుండె, శ్వాసకోశ సంబంధిత సమస్యలతో ఇబ్బందిపడేవారికి అత్యవసర వైద్యం కీలకం. గుంటూరు సర్వజనాస్పత్రిలో ఈ సేవల పట్ల నిర్లక్ష్యం వహిస్తున్నారనే ఆరోపణలు కొంతకాలంగా విన్పిస్తున్నాయి.

తాజాగా సునీమా అనే 12ఏళ్ల బాలిక మృతి వివాదాస్పదమైంది. న్యుమోనియోతో బాధపడుతున్న సునీమాను ఉదయం 11 గంటలకు ఆస్పత్రికి తీసుకొస్తే... సాయంత్రం 5 గంటలకు చనిపోయింది. సకాలంలో వైద్యం అందకపోవడం వల్లే తమ బిడ్డ చనిపోయిందంటూ ఆస్పత్రి ఆవరణలో బాలిక తల్లి రోధించడం అందరినీ కంటతడిపెట్టించింది.

ఇక రోడ్డు ప్రమాదాల్లో గాయపడిన బాధితులకు తక్షణ వైద్యం అందించకుండా కరోనా పరీక్షల పేరుతో సమయం వృథా చేస్తున్నారని, కనీస స్పందన ఉండడం లేదని బాధితులు వాపోతున్నారు. సాధారణంగా అత్యవసర సమయాల్లో యాంటిజెన్ ర్యాపిడ్ కిట్లు ఉపయోగించి సత్వర పరీక్షలు, సత్వర వైద్యం అందించవచ్చు. గుంటూరు జిల్లాకు 15వేల యాంటిజెన్‌ కిట్లు మంజూరైనా వీటిని ఎక్కడ ఉపయోగిస్తున్నారో తెలియట్లేదనే ఆరోపణలున్నాయి.

ఇదీ చదవండీ... అమానుషం : కరోనా బాధితుల్ని ఇంట్లో పెట్టి తాళం వేసిన యజమాని