జులై, ఆగస్టు నెలల్లో కరోనా ఉద్ధృతి మరింత పెరిగే అవకాశం ఉన్నందున ప్రజలు అప్రమత్తంగా ఉండాలని గుంటూరు ఎంపీ గల్లా జయదేవ్ సూచించారు. దేశంలో కేసులు అదుపులోకి రావడం లేదన్నారు. లాక్డౌన్ సడలింపుల తర్వాత కేసుల తీవ్రత మరింత పెరిగిందని ఎంపీ గుర్తు చేశారు. గుంటూరు ప్రభుత్వ సర్వజన ఆస్పత్రిలో కొవిడ్ నియంత్రణ చర్యలు, ఎంపీ లాడ్స్ నిధుల వినియోగంపై జీజీహెచ్ సూపరింటెండెంట్ సుధాకర్తో ఎంపీ జయదేవ్ చర్చించారు.
వెంటిలేటర్లు, పీపీఈల కోసం తను ఎంపీ ల్యాడ్స్ కింద ఇచ్చిన రూ.2.5 కోట్ల నిధులను ఎందుకు పూర్తిగా వినియోగించలేదని ఇంజినీరింగ్ అధికారులను ఎంపీ ప్రశ్నించారు. మరోవైపు.. అచ్చెన్నాయుడు ఆరోగ్య పరిస్థితిని సూపరింటెండెంట్ సుధాకర్ వివరించారు. అచ్చెన్న జ్యుడిషియల్ కస్టడీలో ఉన్నందున నేరుగా కలిసేందుకు అవకాశం లేదని సూపరింటెండెంట్ సుధాకర్ వివరించారు. అనుమతి కోసం దరఖాస్తు చేశామని ఎంపీ గల్లా చెప్పారు.