CM JAGAN TOUR: పశ్చిమ గోదావరి జిల్లాలోని తణుకులో ఈ నెల 21వ తేదీన ముఖ్యమంత్రి జగన్మోహన్ రెడ్డి పర్యటించనున్నట్లు రాష్ట్ర గృహ నిర్మాణ శాఖ మంత్రి చెరుకువాడ శ్రీరంగనాథరాజు తెలిపారు. ముఖ్యమంత్రి పర్యటన సందర్భంగా తణుకులో బహిరంగ సభ ఏర్పాటు చేయనున్నట్లు పేర్కొన్నారు. ఇందుకుగానూ హెలిప్యాడ్, పార్కింగ్లకు అనువైన స్థలాలను మంత్రి పరిశీలించారు.
స్థానికంగా ఉండే శ్రీ ముళ్లపూడి వెంకటరాయ మెమోరియల్ పాలిటెక్నిక్ కళాశాల, శ్రీ చిట్టూరి ఇంద్రయ్య మెమోరియల్ ప్రభుత్వ డిగ్రీ కళాశాల, జిల్లా పరిషత్ బాలుర ఉన్నత పాఠశాల ప్రాంగణాలను మంత్రి పరిశీలించారు. ఈ సందర్భంగా మాట్లాడిన మంత్రి.. జగన్ పుట్టినరోజైన డిసెంబర్ 21వ తేదీన తణుకులో సంపూర్ణ భూ హక్కు పథకాన్ని ప్రారంభిస్తారని చెప్పారు. గత ప్రభుత్వం హయాంలో సుమారు 52 లక్షల మంది ఇళ్లు నిర్మించుకున్నట్లు గుర్తు చేశారు. వారిలో 32 లక్షల మందికి ఈ పథకం ద్వారా లబ్ధి చేకూరుతుందని మంత్రి వివరించారు. లబ్ధిదారులకు ప్రైవేటు ఆస్తి మాదిరిగా దస్తావేజులు ఇవ్వనున్నట్లు స్పష్టం చేశారు.
ఓటీఎస్ పథకాన్ని గత ప్రభుత్వాల హయాంలోనే ప్రవేశపెట్టారని మంత్రి గుర్తు చేశారు. అప్పుడు కేవలం వడ్డీ మాత్రమే మాఫీ చేసినట్టు చెప్పారు. తమ ప్రభుత్వం అధికారంలోకి వస్తే పూర్తిగా మాఫీ చేస్తామని చంద్రబాబు హామీ ఇచ్చారని పేర్కొన్న మంత్రి.. చివరకు 43,667 మంది వడ్డీతోసహా చెల్లించినా ఎటువంటి హక్కూ లేని డీ ఫారం పట్టాలు ఇచ్చారని చెప్పారు.