ఐదేళ్లలో చంద్రబాబు అమరావతిని అభివృద్ధి చేయకుండా... ఇప్పుడు పర్యటనల పేరుతో హడావుడి చేస్తున్నారని... జలవనరుల శాఖ మంత్రి అనిల్‌కుమార్‌ యాదవ్ ధ్వజమెత్తారు. కర్నూల్లో పర్యటిస్తున్న ఆయన మీడియాతో మాట్లాడారు. తెదేపాను ప్రజలు 23 సీట్లకే పరిమితం చేసినా... చంద్రబాబులో మార్పు రాలేదన్నారు. అమరావతి పేరుతో వేల కోట్లు దోపిడి చేశారని ఆరోపించారు. అమరావతిలో బాబుకు నల్ల జెండాలు, చెప్పులతో స్వాగతం పలికారని ఎద్దేవా చేశారు. ఇప్పటికైన మారకుంటే అమరావతిలో జరిగినట్లే అన్ని జిల్లాల్లో జరుగుతుందని దుయ్యబట్టారు.
పెయిడ్ ఆర్టిస్ట్లతో దాడులు...
అమరావతిలో తాత్కాలిక భవనాలు తప్ప చంద్రబాబు ఏ కట్టడాలు నిర్మించారో... చూపించాలని తాడికొండ ఎమ్మెల్యే ఉండవల్లి శ్రీదేవి డిమాండ్ చేశారు. రాజధానిలో పర్యటించే సమయంలో తెలుగుదేశం పార్టీ నేతలే పెయిడ్ ఆర్టిస్టులతో రైతులపై దాడి చేయించారని ఆరోపించారు. ప్యాకేజీల పేరుతో రైతులను మోసం చేశారని విమర్శించారు. అంబేడ్కర్ స్మృతివనం దగ్గరికి చంద్రబాబు ఎందుకు వెళ్లలేదని ప్రశ్నించారు. ఇన్సైడ్ ట్రేడింగ్ పేరుతో రాజధాని వాసులను మోసం చేశారని ఆరోపించారు.
'సింగపూర్' వెళ్లిపోవడానికి బాబే కారణం...
ప్రజలను తప్పుదోవ పట్టించటమే చంద్రబాబు పనిగా పెట్టుకున్నారని అనంతపురం ఎమ్మెల్యే అనంత వెంకటరామిరెడ్డి అన్నారు. అవినీతి, అక్రమాలకు పాల్పడిన మాజీముఖ్యమంత్రి చంద్రబాబు, తన అవినీతి వెలుగులోకి వస్తుందనే ప్రభుత్వంపై ఆరోపణలు చేస్తున్నారని మండిపడ్డారు. అమరావతి స్టార్టప్ ప్రాజెక్టు నుంచి సింగపూర్ కన్సార్షియం వెళ్లిపోవడానికి కారణం చంద్రబాబే అని ఆరోపించారు. అమరావతిలో నిజంగా అభివృద్ధి జరిగితే... లోకేశ్ ఎందుకు ఓడిపోయారని అనంత ప్రశ్నించారు.
వికేంద్రీకరణతోనే అభివృద్ధి...
ఎప్పుడో రాచరికం ఉన్నప్పుడు రాజధాని కేంద్రీకరణ జరిగిందని... ఇప్పుడు ప్రపంచంలో ఎక్కడ చూసినా వికేంద్రీకరణ జరుగుతోందని మంత్రి బుగ్గన పేర్కొన్నారు. కేవలం అమరావతినే అభివృద్ధి చేయాలని చంద్రబాబు అనడం హాస్యాస్పదం అని ఎద్దేవా చేశారు. ఐదేళ్లపాటు అమరావతిని ఎందుకు నోటిఫై చేయలేదని ప్రశ్నించారు. రాజధానిలో జరిగిన అన్ని అవినీతి పనులను బయటపెడతామని స్పష్టం చేశారు.