ఏపీలో భారీ ప్రాజెక్టు... ప్రపంచ బ్యాంక్ సాయం

రాష్ట్రంలో భారీ స్థాయిలో నిర్మించే వాటర్ షెడ్ ప్రాజెక్టుకు... నిధులు ఇచ్చేందుకు ప్రపంచ బ్యాంకు సంసిద్ధత వ్యక్తం చేసింది. ఈ మేరకు ప్రపంచ బ్యాంకు ప్రతినిధులు మంత్రి పెద్దిరెడ్డి రాంచంద్రారెడ్డితో సచివాలయంలో సమావేశమయ్యారు. ఐదేళ్లలో 70 మిలియన్ డాలర్ల రుణాన్ని అందించాలని ప్రపంచ బ్యాంక్ నిర్ణయించినట్టు ప్రభుత్వం తెలిపింది.

ఆంధ్రప్రదేశ్‌లో వాటర్ షెడ్ ప్రాజెక్టుకు నిధులు ఇచ్చేందుకు ప్రపంచ బ్యాంకు ముందుకొచ్చింది. సచివాలయంలో పంచాయితీరాజ్, గ్రామీణాభివృద్ధి శాఖ మంత్రి పెద్దిరెడ్డి రామచంద్రారెడ్డితో సమావేశమైన ప్రపంచబ్యాంకు ప్రతినిధులు... వచ్చే ఐదేళ్లలో ఏపీకి దాదాపు 70 మిలియన్ డాలర్ల రుణం ఇచ్చేందుకు సుముఖత వ్యక్తంచేశారు.

70శాతం నిధులు ప్రపంచ బ్యాంకు నుంచే..!
ఈ ప్రాజెక్టు కోసం 70 శాతం నిధులు ప్రపంచబ్యాంకు ఇవ్వనుండగా... 30 శాతం నిధులు ప్రభుత్వం సమకూర్చనుంది. తొలివిడతలో తక్కువ వర్షపాతం ఉండే రాయలసీమ, ప్రకాశం జిల్లాల్లో పథకాన్ని అమలు చేయాలని నిర్ణయించారు. ఈ ప్రాజెక్టు కింద నీటి ఎద్దడి ప్రాంతాల్లో జల వనరుల సంరక్షణ, ఆధునిక నీటి యాజమాన్య విధానాల ద్వారా... నీటి వనరులను సద్వినియోగం చేసుకునే కార్యక్రమాలు చేపడతారు.

ఏపీశాట్ ద్వారా భూసారపరీక్షలు, ఎరువులు, పోషకాల విషయంలో రైతులకు సూచనలు, గ్రామాల్లో ఉపయోగం లేని వ్యవసాయ పెట్టుబడిని తగ్గించడం, అధిక ఉత్పత్తుల సాధనకు మెరుగైన విధానాలపై అవగాహన పెంపొందిస్తారు. భూసార నివేదికలు, నేల స్వభావాన్ని అనుసరించి ఏ పంటలు సాగు చేయాలనే అంశాలపై వ్యవసాయశాఖ, వ్యవసాయ యూనివర్సిటీ భాగస్వామ్యంతో ఖరారు చేస్తామని ప్రపంచ బ్యాంకు ప్రతినిధులు వెల్లడించారు.

ఇదీ చదవండి : మావోయిస్టుల గెరిల్లా వారోత్సవాలు... మన్యంలో ఉద్రిక్తత..!