రాజధాని అమరావతి కోసం రైతులు, మహిళలు తమ పోరాటాన్ని ఉద్ధృతం చేశారు. వాతావరణ ప్రతికూల పరిస్థితులు ఎదురవుతున్నప్పటికీ క్షేత్రస్థాయిలో పోరాడుతున్నారు. 3 రాజధానులకు వ్యతిరేకంగా తుళ్లూరు ధర్నా శిబిరంలో ఓవైపు నిరసన చేపడుతూనే... స్వాతంత్య్ర వేడుకలనూ ఘనంగా నిర్వహించారు. శిబిరం వద్ద మువ్వన్నెల జాతీయ పతాకాన్ని ఐకాస నేతలు ఆవిష్కరించారు. అనంతరం సుభాష్ చంద్రబోస్ విగ్రహం వద్ద నివాళులు అర్పించారు. భారీ జాతీయ పతాకాన్ని ప్రదర్శిస్తూ రైతులు, మహిళలు నినాదాలు చేశారు.
నాడు బ్రిటిష్ దాస్యశృంఖలాలు తెంచుకునేందుకు పోరాడారని.. నేడు రాష్ట్ర ప్రభుత్వం అవలంబిస్తున్న ప్రజావ్యతిరేక విధానాలకు వ్యతిరేకంగా పోరాడుతున్నామని రైతులు స్పష్టం చేశారు. స్వాతంత్య్ర ఉద్యమ స్పూర్తితోనే రాజధాని ఉద్యమాన్ని మరింత ముందుకు తీసుకువెళ్తామని రైతులు, మహిళలు అభిప్రాయపడ్డారు. పైసా తీసుకోకుండానే భూసమీకరణ విధానం ద్వారా ప్రభుత్వానికి భూములు అప్పగించామని... రాష్ట్ర ప్రభుత్వం మారినంత మాత్రాన రాజధాని మారుస్తారని ఊహించలేదని రైతులు, మహిళలు ఆవేదన వ్యక్తం చేశారు.