త్వరలో పార్లమెంట్ వర్షాకాల సమావేశాలు జరగనున్న నేపథ్యంలో వైకాపా ఎంపీలతో సీఎం జగన్‌ సమావేశమయ్యారు. సభలో అనుసరించాల్సిన వ్యూహంపై దిశానిర్దేశం చేశారు. సమావేశం అనంతరం ఎంపీ విజయసాయి రెడ్డి మీడియాతో మాట్లాడారు. ప్రధానంగా పోలవరం నిధుల అంశాన్ని పార్లమెంట్లో లేవనెత్తుతామని చెప్పారు. విశాఖ స్టీల్ప్లాంట్ ప్రైవేటీకరణను పూర్తిగా వ్యతిరేకిస్తున్నట్లు గళం వినిపిస్తామన్నారు. జాతీయ ప్రాజెక్టుల వ్యయాన్ని కేంద్రమే భరించాల్సి ఉందని.. రాష్ట్రమే పోలవరం వ్యయాన్ని భరిస్తోందని విజయసాయి తెలిపారు. ఆర్ అండ్ ఆర్ ప్యాకేజీకి సంబంధించి పైసా విడుదల కాలేదన్నారు.
తెలంగాణ చేపట్టిన అక్రమ ప్రాజెక్టులు.. తెలంగాణ నుంచి రావాల్సిన విద్యుత్‌ బకాయిల అంశాలపై.. పార్లమెంటులో ప్రస్తావిస్తామని తెలిపారు. కేఆర్‌ఎంబీ పరిమితిని కేంద్రం నోటిఫై చేయాలని కోరుతామన్నారు. తెలంగాణ చెల్లించని రూ.6,112 కోట్ల విద్యుత్‌ బకాయిలపై పార్లమెంట్లో ప్రస్తావిస్తామన్నారు. రాష్ట్రాల మధ్య వివాదాలపై కేంద్రం జోక్యం చేసుకోవాలని కోరుతామని విజయసాయి తెలిపారు.
"శ్రీశైలంలో 800 అడుగులుండగానే లిఫ్టుకు అనుమతించాలని కోరుతాం. తెలంగాణలో 800అడుగుల్లోపు 50 టీఎంసీలతో 5 ప్రాజెక్టులు చేపట్టారు. ఏపీలోనూ 800 అడుగులకే ఎత్తిపోతలకు అనుమతించాలని కోరుతాం. కృష్ణా జలాల వినియోగంలో తెలంగాణ నిబంధనలు ఉల్లంఘిస్తోంది."- ఎంపీ విజయసాయి రెడ్డి